ye bhul ja ki hain tere bhi gham-gusar bahut

ye bhuul jā ki haiñ tere bhī ġham-gusār bahut

banānā kāġhzī phūloñ ke ḳhushk haar bahut

jo chashm-e-yār hai hosh-o-ḳhirad shikār bahut

dil-o-nazar pe hameñ bhī hai iḳhtiyār bahut

ham apne vaqt kī tasvīr-e-masḳh-sūrat haiñ

dikhā.e ham ko na ā.īna rozgār bahut

ḳhudā vo vaqt na laa.e ki āzmā.ish ho

ta.alluqāt tumhīñ se haiñ ustuvār bahut

kisī bhī shāḳh pe jab merā āshiyāñ na milā

chaman meñ aaj phirī barq be-qarār bahut

dil-e-tabāh kī nairañgiyoñ kā haal na pūchh

gahe qarār bahut gaah be-qarār bahut

hayāt nāzish-e-kaunain ho to kyā ġham hai

vo chaar din kī sahī umr-e-musta.ār bahut

hameñ to apnī vafāoñ kā mil rahā hai sila

jafā-o-jaur pe vo kyuuñ haiñ sharmsār bahut

bahut dinoñ se ab apnī talāsh meñ gum haiñ

'ra.īs' chhān chuke ḳhāk-e-kū-e-yār bahut

ye bhul ja ki hain tere bhi gham-gusar bahut

banana kaghzi phulon ke KHushk haar bahut

jo chashm-e-yar hai hosh-o-KHirad shikar bahut

dil-o-nazar pe hamein bhi hai iKHtiyar bahut

hum apne waqt ki taswir-e-masKH-surat hain

dikhae hum ko na aaina rozgar bahut

KHuda wo waqt na lae ki aazmaish ho

talluqat tumhin se hain ustuwar bahut

kisi bhi shaKH pe jab mera aashiyan na mila

chaman mein aaj phiri barq be-qarar bahut

dil-e-tabah ki nairangiyon ka haal na puchh

gahe qarar bahut gah be-qarar bahut

hayat nazish-e-kaunain ho to kya gham hai

wo chaar din ki sahi umr-e-mustaar bahut

hamein to apni wafaon ka mil raha hai sila

jafa-o-jaur pe wo kyun hain sharmsar bahut

bahut dinon se ab apni talash mein gum hain

'rais' chhan chuke KHak-e-ku-e-yar bahut