ye but jo humne dobara bana ke rakkha hai

ye but jo ham ne dobāra banā ke rakkhā hai

isī ne ham ko tamāshā banā ke rakkhā hai

vo kis tarah hameñ in.aam se navāzegā

vo jis ne hāthoñ ko kaasa banā ke rakkhā hai

yahāñ pe koī bachāne tumheñ na aa.egā

samundaroñ ne jazīra banā ke rakkhā hai

tamām umr kā hāsil hai ye hunar merā

ki maiñ ne shīshe ko hiirā banā ke rakkhā hai

kise kise abhī sajda-guzār honā hai

amīr-e-shahr ne khātā banā ke rakkhā hai

maiñ bach gayā to yaqīnan ye mo.ajiza hogā

sabhī ne mujh ko nishāna banā ke rakkhā hai

koī batā de ye sūraj ko jā ke ham ne bhī

shajar ko dhuup meñ chhātā banā ke rakkhā hai

ye but jo hum ne dobara bana ke rakkha hai

isi ne hum ko tamasha bana ke rakkha hai

wo kis tarah hamein inam se nawazega

wo jis ne hathon ko kasa bana ke rakkha hai

yahan pe koi bachane tumhein na aaega

samundaron ne jazira bana ke rakkha hai

tamam umr ka hasil hai ye hunar mera

ki main ne shishe ko hira bana ke rakkha hai

kise kise abhi sajda-guzar hona hai

amir-e-shahr ne khata bana ke rakkha hai

main bach gaya to yaqinan ye moajiza hoga

sabhi ne mujh ko nishana bana ke rakkha hai

koi bata de ye suraj ko ja ke hum ne bhi

shajar ko dhup mein chhata bana ke rakkha hai