ye chahte hain ki jam-e-ulfat ka zehn-o-dil se asar na jae

ye chāhte haiñ ki jām-e-ulfat kā zehn-o-dil se asar na jaa.e

pilā do ham ko phir is se pahle nasha hamārā utar na jaa.e

hamīñ se hai mai-kade kī raunaq hamīñ se saarā nizām-e-rindāñ

ye kaise mumkin hai sāqiyā ab hamāre uupar nazar na jaa.e

tumhārī ḳhātir hī rāstoñ par bichhā ke rakkhī haiñ ham ne āñkheñ

chale bhī aao ki bin tumhāre ye mausam-e-gul guzar na jaa.e

varaq varaq par tumhārā charchā tumhārī yādeñ tumhārī bāteñ

baḌī hifāzat se rakh rahā huuñ kitāb-e-dil hai bikhar na jaa.e

maiñ chāhtā huuñ ki tum se kah duuñ magar ye mujh se na ho sakegā

ye dil ke iz.hār kā parinda qafas ke andar hī mar nā jaa.e

tumhāre dar se maiñ apnā sar bhī tabhī uThā.ūñgā jān-e-jānāñ

ki jab talak 'ārzū' kā bigḌā huā muqaddar sañvar na jaa.e

ye chahte hain ki jam-e-ulfat ka zehn-o-dil se asar na jae

pila do hum ko phir is se pahle nasha hamara utar na jae

hamin se hai mai-kade ki raunaq hamin se sara nizam-e-rindan

ye kaise mumkin hai saqiya ab hamare upar nazar na jae

tumhaari KHatir hi raston par bichha ke rakkhi hain hum ne aankhen

chale bhi aao ki bin tumhaare ye mausam-e-gul guzar na jae

waraq waraq par tumhaara charcha tumhaari yaaden tumhaari baaten

baDi hifazat se rakh raha hun kitab-e-dil hai bikhar na jae

main chahta hun ki tum se kah dun magar ye mujh se na ho sakega

ye dil ke izhaar ka parinda qafas ke andar hi mar na jae

tumhaare dar se main apna sar bhi tabhi uThaunga jaan-e-jaanan

ki jab talak 'arzu' ka bigDa hua muqaddar sanwar na jae