ye chand sitaron ki ziya kam to nahin hai

ye chāñd sitāroñ kī ziyā kam to nahīñ hai

jaltā huā har samt diyā kam to nahīñ hai

maiñ kyoñ karūñ asbāb o muqaddar pe bharosā

mere liye ik nām-e-ḳhudā kam to nahīñ hai

paisoñ se to lete haiñ faqīroñ kī duā.eñ

ye apne buzurgoñ kī duā kam to nahīñ hai

maġhrib kī fusūñ-sāz havāoñ se ġharaz kyā

mashriq meñ mirī bād-e-sabā kam to nahīñ hai

kyoñ haath mire ḳhuun se rañgte ho tum apne

surḳhī ke liye rang-e-hinā kam to nahīñ hai

karte haiñ 'jamīl' aap jo marne kī tamanna

is dahr meñ jiine kā mazā kam to nahīñ hai

ye chand sitaron ki ziya kam to nahin hai

jalta hua har samt diya kam to nahin hai

main kyon karun asbab o muqaddar pe bharosa

mere liye ek nam-e-KHuda kam to nahin hai

paison se to lete hain faqiron ki duaen

ye apne buzurgon ki dua kam to nahin hai

maghrib ki fusun-saz hawaon se gharaz kya

mashriq mein meri baad-e-saba kam to nahin hai

kyon hath mere KHun se rangte ho tum apne

surKHi ke liye rang-e-hina kam to nahin hai

karte hain 'jamil' aap jo marne ki tamanna

is dahr mein jine ka maza kam to nahin hai