ye chalti-phirti si lashen shumar karne ko

ye chaltī-phirtī sī lāsheñ shumār karne ko

bahut hai kaam sar-e-rahguzār karne ko

guzar rahe haiñ ba-ujlat bahār ke ayyām

paḌā hai raḳht-e-badan taar taar karne ko

gale kī samt mire apne haath baḌhte haiñ

rahā hī kyā hai bhalā e'tibār karne ko

badan ko chaaT liyā hai siyāh kaa.ī ne

abhī to kitne samundar haiñ paar karne ko

abhī se chāñd sitāroñ kī āñhkeñ pathrā.ī

paḌī hai raat abhī intizār karne ko

samajh meñ aa na sakī ye adā gulāboñ kī

chaman meñ aate haiñ siina figār karne ko

ye chalti-phirti si lashen shumar karne ko

bahut hai kaam sar-e-rahguzar karne ko

guzar rahe hain ba-ujlat bahaar ke ayyam

paDa hai raKHt-e-badan tar tar karne ko

gale ki samt mere apne hath baDhte hain

raha hi kya hai bhala e'tibar karne ko

badan ko chaT liya hai siyah kai ne

abhi to kitne samundar hain par karne ko

abhi se chand sitaron ki aanhken pathrai

paDi hai raat abhi intizar karne ko

samajh mein aa na saki ye ada gulabon ki

chaman mein aate hain sina figar karne ko