ye chiKHen ye aah-o-buka kis liye hai

ye chīḳheñ ye āh-o-bukā kis liye hai

mire shahr kī ye fazā kis liye hai

batā zinda-dargor hai aadmī kyoñ

batā āsmāñ par ḳhudā kis liye hai

haiñ masle hue shāḳh dar shāḳh gul kyoñ

chaman dar chaman sāneha kis liye hai

akelā diyā rahguzar kā bujhā kar

pashemāñ bahut ab havā kis liye hai

jo tum sāmne aa.e to maiñ ne jaanā

ki manzar ne badlī qabā kis liye hai

na taz.īn-e-gul hai na paiġhām-e-ḳhushbū

gulistāñ meñ chaltī sabā kis liye hai

mujhe zindagī meñ diyā thā jahannum

to ab roz-e-mahshar sazā kis liye hai

ye tai hai yahāñ koī dar kab khulegā

ai darvesh detā duā kis liye hai

mire chārāgar tū ne va.ada kiyā thā

to phir dil kā ghaav bharā kis liye hai

ba-nām-e-sazā jab milā hai ye jīvan

to jiine meñ itnā mazā kis liye hai

kisī kī bhī jab muntazir maiñ nahīñ huuñ

to dar merā āḳhir khulā kis liye hai

duāoñ meñ merī asar aa gayā kyā

vo yuuñ jaate jaate rukā kis liye hai

'tabassum' ho kaise ye uqda-kushā.ī

baqā kis kī ḳhātir fanā kis liye hai

ye chiKHen ye aah-o-buka kis liye hai

mere shahr ki ye faza kis liye hai

bata zinda-dargor hai aadmi kyon

bata aasman par KHuda kis liye hai

hain masle hue shaKH dar shaKH gul kyon

chaman dar chaman saneha kis liye hai

akela diya rahguzar ka bujha kar

pasheman bahut ab hawa kis liye hai

jo tum samne aae to main ne jaana

ki manzar ne badli qaba kis liye hai

na tazin-e-gul hai na paigham-e-KHushbu

gulistan mein chalti saba kis liye hai

mujhe zindagi mein diya tha jahannum

to ab roz-e-mahshar saza kis liye hai

ye tai hai yahan koi dar kab khulega

ai darwesh deta dua kis liye hai

mere chaaragar tu ne wada kiya tha

to phir dil ka ghaw bhara kis liye hai

ba-nam-e-saza jab mila hai ye jiwan

to jine mein itna maza kis liye hai

kisi ki bhi jab muntazir main nahin hun

to dar mera aaKHir khula kis liye hai

duaon mein meri asar aa gaya kya

wo yun jate jate ruka kis liye hai

'tabassum' ho kaise ye uqda-kushai

baqa kis ki KHatir fana kis liye hai