ye dagh-e-dil tere ruKH ka jawab ho na saka

ye dāġh-e-dil tire ruḳh kā javāb ho na sakā

charāġh laakh jalā āftāb ho na sakā

hazār baar zamāne ne karvaTeñ badlīñ

mirī vafā meñ koī inqalāb ho na sakā

kaho ki chheḌ ke chhāloñ ko kyā milā āḳhir

lahū meñ Duub ke kāñTā gulāb ho na sakā

zamīñ pe jaam bhī TuuTe falak pe aḳhtar bhī

shikast-e-shīsha-e-dil kā javāb ho na sakā

ma.āl-e-valvala-e-arz-e-shauq kyā kahiye

zabān kaisī nazar se ḳhitāb ho na sakā

harīm-e-dost kī rif.at are ma.āz-allāh

ba-juz ḳhayāl koī bāryāb ho na sakā

vo chashm-e-mast kuchh aisī jhukī jhukī sī rahī

ba-qadr-e-hausla koī ḳharāb ho na sakā

nazar nazar meñ samā kar rahe bahar-sūrat

hijāb kar na sake yā hijāb ho na sakā

shafaq nikhar ke bhī terī harīf ban na sakī

chaman sañvar ke bhī terā javāb ho na sakā

dam-e-vidā.a ye majbūriyāñ mohabbat kī

salām kā bhī kisī ke javāb ho na sakā

hazār husn-o-nazākat se shāḳh-e-gul lachkī

salām-e-nāz kā tere javāb ho na sakā

ye dagh-e-dil tere ruKH ka jawab ho na saka

charagh lakh jala aaftab ho na saka

hazar bar zamane ne karwaTen badlin

meri wafa mein koi inqalab ho na saka

kaho ki chheD ke chhaalon ko kya mila aaKHir

lahu mein Dub ke kanTa gulab ho na saka

zamin pe jam bhi TuTe falak pe aKHtar bhi

shikast-e-shisha-e-dil ka jawab ho na saka

maal-e-walwala-e-arz-e-shauq kya kahiye

zaban kaisi nazar se KHitab ho na saka

harim-e-dost ki rifat are maaz-allah

ba-juz KHayal koi baryab ho na saka

wo chashm-e-mast kuchh aisi jhuki jhuki si rahi

ba-qadr-e-hausla koi KHarab ho na saka

nazar nazar mein sama kar rahe bahar-surat

hijab kar na sake ya hijab ho na saka

shafaq nikhar ke bhi teri harif ban na saki

chaman sanwar ke bhi tera jawab ho na saka

dam-e-widaa ye majburiyan mohabbat ki

salam ka bhi kisi ke jawab ho na saka

hazar husn-o-nazakat se shaKH-e-gul lachki

salam-e-naz ka tere jawab ho na saka