ye dard-e-hijr yahan tak to sazgar aae

ye dard-e-hijr yahāñ tak to sāzgār aa.e

vo ḳhud hī ban ke sarāpā-e-intizār aa.e

maza to jab hai ki iḳhfā-e-rāz ke bā-vasf

mirī zabāñ pe tirā naam baar baar aa.e

hayāt-e-'ishq kā jab jā.eza liyā ham ne

ḳhud apne jurm nigāhoñ meñ be-shumār aa.e

bajā hai zauq-e-talab lekin us se kyā hāsil

qadam bahakne lageñ jab tirā dayār aa.e

ḳhudā se kyā gila-e-jaur-e-zindagī kījiye

guzārnī thī ghaḌī do ghaḌī guzār aa.e

vahīñ vahīñ se ik āvāz-e-bāzgasht aa.ī

jahāñ-jahāñ tujhe ai dost ham pukār aa.e

'ajab nahīñ unhī rāhoñ ke pech-o-ḳham meñ 'hazīñ'

mujhe talāsh hai jis kī vo rahguzār aa.e

ye dard-e-hijr yahan tak to sazgar aae

wo KHud hi ban ke sarapa-e-intizar aae

maza to jab hai ki iKHfa-e-raaz ke ba-wasf

meri zaban pe tera nam bar bar aae

hayat-e-'ishq ka jab jaeza liya hum ne

KHud apne jurm nigahon mein be-shumar aae

baja hai zauq-e-talab lekin us se kya hasil

qadam bahakne lagen jab tera dayar aae

KHuda se kya gila-e-jaur-e-zindagi kijiye

guzarni thi ghaDi do ghaDi guzar aae

wahin wahin se ek aawaz-e-bazgasht aai

jahan-jahan tujhe ai dost hum pukar aae

'ajab nahin unhi rahon ke pech-o-KHam mein 'hazin'

mujhe talash hai jis ki wo rahguzar aae