ye dard ka hai musalsal jo silsila kyun hai

ye dard kā hai musalsal jo silsila kyuuñ hai

Thahar Thahar ke koī dil meñ jhāñktā kyuuñ hai

nahīñ hai koī ta.alluq agar mirā tujh se

to phir ye chehrā tirā zard zard sā kyuuñ hai

fareb khā ke bhī va.ade pe e'tibār kiyā

subūt phir bhī vafā kā vo māñgtā kyuuñ hai

agar hai jītnā maqsad to phir batā.e koī

vo jān-būjh ke baazī ko hārtā kyuuñ hai

ajiib log haiñ us par savāl karte haiñ

kabhī to socheñ ki āḳhir vo ġham-zada kyuuñ hai

agar hai daur-e-taraqqī to daur-e-hāzir meñ

batāo mujh ko ki har samt karbalā kyuuñ hai

hai ḳhuun ek hī jaisā ragoñ meñ jab 'sāhil'

to phir ye soch sabhī kī judā judā kyuuñ hai

ye dard ka hai musalsal jo silsila kyun hai

Thahar Thahar ke koi dil mein jhankta kyun hai

nahin hai koi talluq agar mera tujh se

to phir ye chehra tera zard zard sa kyun hai

fareb kha ke bhi wade pe e'tibar kiya

subut phir bhi wafa ka wo mangta kyun hai

agar hai jitna maqsad to phir batae koi

wo jaan-bujh ke bazi ko haarta kyun hai

ajib log hain us par sawal karte hain

kabhi to sochen ki aaKHir wo gham-zada kyun hai

agar hai daur-e-taraqqi to daur-e-hazir mein

batao mujh ko ki har samt karbala kyun hai

hai KHun ek hi jaisa ragon mein jab 'sahil'

to phir ye soch sabhi ki juda juda kyun hai