ye dariya hai koi ki pani pani guftugu hai

ye dariyā hai koī ki paanī paanī guftugū hai

havā kī sāhiloñ se bādbānī guftugū hai

samundar terī lahreñ haiñ ki zereñ aur zabreñ

samundar terī saarī be-karānī guftugū hai

ikaTThe kar rahī hai māmtā komal se tinke

shajar se shāḳhchoñ kī āshyiānī guftugū hai

ye Dhaltī chhāñv hai qismat se haath aate haiñ ash'ār

ki daulat kī tarah ye ānī-jānī guftugū hai

alag haiñ baaġh meñ rangoñ kī mustā’mal zabāneñ

parinde ke gale kī surḳh-gānī guftugū hai

banāyā hai inhī lafzoñ ko jaise chhāj chhalnī

ki sahrāoñ ke din kaaTe haiñ chhānī guftugū hai

galī-kūchoñ meñ ḳhāmoshī kā barpā hai koī shor

ki shahroñ se yahī naql-e-makānī guftugū hai

chhalak uThtī hai rājoñ aur mahrājoñ ke aage

kisī kī rang-zā nīñdoñ kī raanī guftugū hai

jo maiñ apnī taraf se taaza taaza kah rahā huuñ

kisī mere hī jaise kī purānī guftugū hai

ye dariya hai koi ki pani pani guftugu hai

hawa ki sahilon se baadbani guftugu hai

samundar teri lahren hain ki zeren aur zabren

samundar teri sari be-karani guftugu hai

ikaTThe kar rahi hai mamta komal se tinke

shajar se shaKHchon ki aashyiani guftugu hai

ye Dhalti chhanw hai qismat se hath aate hain ash'ar

ki daulat ki tarah ye aani-jaani guftugu hai

alag hain bagh mein rangon ki musta’mal zabanen

parinde ke gale ki surKH-gani guftugu hai

banaya hai inhi lafzon ko jaise chhaj chhalni

ki sahraon ke din kaTe hain chhani guftugu hai

gali-kuchon mein KHamoshi ka barpa hai koi shor

ki shahron se yahi naql-e-makani guftugu hai

chhalak uThti hai rajon aur mahrajon ke aage

kisi ki rang-za nindon ki rani guftugu hai

jo main apni taraf se taza taza kah raha hun

kisi mere hi jaise ki purani guftugu hai