ye dauD-dhup ba-har-subh-o-sham kis ke liye

ye dauḌ-dhūp ba-har-sub.h-o-shām kis ke liye

bas ek naam kī ḳhātir ye naam kis ke liye

mirā vajūd ba-sad ehtimām kis ke liye

tamām umr jalā sub.h-o-shām kis ke liye

yahāñ to koī nahīñ ūñghte diyoñ ke sivā

bharā hai tum ne mohabbat kā jaam kis ke liye

umañD paḌī hai ḳhudā.ī ajiib aalam hai

sunā gayā vo sazā-e-davām kis ke liye

bahut kaThin hai mohabbat kī nāz-bardārī

vo shaḳhs chhoḌ gayā hai ye kaam kis ke liye

ye rāh-o-rasm zamāne se kis kī ḳhātir hai

ye har kisī se duā-o-salām kis ke liye

vahī jo ḳhuun ke pyāse the kal talak 'nāzim'

ye mīThe bol ye shīrīñ kalām kis ke liye

ye dauD-dhup ba-har-subh-o-sham kis ke liye

bas ek nam ki KHatir ye nam kis ke liye

mera wajud ba-sad ehtimam kis ke liye

tamam umr jala subh-o-sham kis ke liye

yahan to koi nahin unghte diyon ke siwa

bhara hai tum ne mohabbat ka jam kis ke liye

umanD paDi hai KHudai ajib aalam hai

suna gaya wo saza-e-dawam kis ke liye

bahut kaThin hai mohabbat ki naz-bardari

wo shaKHs chhoD gaya hai ye kaam kis ke liye

ye rah-o-rasm zamane se kis ki KHatir hai

ye har kisi se dua-o-salam kis ke liye

wahi jo KHun ke pyase the kal talak 'nazim'

ye miThe bol ye shirin kalam kis ke liye