ye dekh zindagi ke liye hai payam kya

ye dekh zindagī ke liye hai payām kyā

din kyā hai raat kyā hai sahar kyā hai shaam kyā

manzil kī justujū hai to chalte chale chalo

ġhurbat meñ thoḌī der Thahar kar qayām kyā

jab nek aur bad meñ na rah jaa.e imtiyāz

hogā kisī kā aise meñ phir ehtirām kyā

aap apne dushmanoñ ko bhī dushman na jāniye

paḌ jaa.e kal unhīñ se ḳhudā jaane kaam kyā

insān apne aap ko pahchāntā nahīñ

ye sochtā nahīñ ki hai us kā maqām kyā

duniyā-e-zindagī meñ musāvāt chāhiye

is silsile meñ shart-e-ḳhavās-o-avām kyā

duniyā meñ koī naam achhūtā nahīñ rahā

badloge apnā naam to rakkhoge naam kyā

jis haal meñ bhī guzre guzar jā.egī 'la.īq'

thoḌī sī zindagī ke liye ehtimām kyā

ye dekh zindagi ke liye hai payam kya

din kya hai raat kya hai sahar kya hai sham kya

manzil ki justuju hai to chalte chale chalo

ghurbat mein thoDi der Thahar kar qayam kya

jab nek aur bad mein na rah jae imtiyaz

hoga kisi ka aise mein phir ehtiram kya

aap apne dushmanon ko bhi dushman na jaaniye

paD jae kal unhin se KHuda jaane kaam kya

insan apne aap ko pahchanta nahin

ye sochta nahin ki hai us ka maqam kya

duniya-e-zindagi mein musawat chahiye

is silsile mein shart-e-KHawas-o-awam kya

duniya mein koi nam achhuta nahin raha

badloge apna nam to rakkhoge nam kya

jis haal mein bhi guzre guzar jaegi 'laiq'

thoDi si zindagi ke liye ehtimam kya