ye dil hai dard mein lat-pat koi batae use

ye dil hai dard meñ lat-pat koī batā.e use

bahut zarūrī hai hijrat koī batā.e use

koī batā.e use lauT kar vo aa jaa.e

mujhe hai us kī zarūrat koī batā.e use

ab intizār ke qābil nahīñ rahā yaaro

bigaḌ chukī hai tabī'at koī batā.e use

ye baat tai hai bichhaḌnā hai ek roz hameñ

ye saath hī hai ġhanīmat koī batā.e use

aziyyatoñ se to bāhar vo aa gayā hai dost

mujhe hai ab bhī aziyyat koī batā.e use

ḳhayāl karnā paḌegā use mohabbat kā

karegā kaun hifāzat koī batā.e use

vo mujh se rūThā hai yā us ne mujh ko chhoḌ diyā

karegā kaun vakālat koī batā.e use

mohabbatoñ meñ siyāsat koī nahīñ kartā

vo kar rahā hai siyāsat koī batā.e use

kisī tarah se ḳhabar yaar tak pahuñch jaa.e

satātī hai mujhe ‘uzlat koī batā.e use

hai intizār usī kā abhī talak 'afnān'

mujhe hai us se mohabbat koī batā.e use

ye dil hai dard mein lat-pat koi batae use

bahut zaruri hai hijrat koi batae use

koi batae use lauT kar wo aa jae

mujhe hai us ki zarurat koi batae use

ab intizar ke qabil nahin raha yaro

bigaD chuki hai tabi'at koi batae use

ye baat tai hai bichhaDna hai ek roz hamein

ye sath hi hai ghanimat koi batae use

aziyyaton se to bahar wo aa gaya hai dost

mujhe hai ab bhi aziyyat koi batae use

KHayal karna paDega use mohabbat ka

karega kaun hifazat koi batae use

wo mujh se ruTha hai ya us ne mujh ko chhoD diya

karega kaun wakalat koi batae use

mohabbaton mein siyasat koi nahin karta

wo kar raha hai siyasat koi batae use

kisi tarah se KHabar yar tak pahunch jae

satati hai mujhe ‘uzlat koi batae use

hai intizar usi ka abhi talak 'afnan'

mujhe hai us se mohabbat koi batae use