ye dil jo dard-e-mohabbat se be-qarar nahin

ye dil jo dard-e-mohabbat se be-qarār nahīñ

vo sub.h-e-shauq nahīñ shām-e-intizār nahīñ

kisī nigāh meñ mastī nahīñ ḳhumār nahīñ

ye koī aur haiñ saaqī ye bāda-ḳhvār nahīñ

tumhārī shāḳh-e-nasheman meñ barg-o-bār nahīñ

bahār meñ bhī tumhāre liye bahār nahīñ

guloñ kī ġhunchoñ kī pazhmurdagī se zāhir hai

chaman meñ aaj bhī hālāt sāzgār nahīñ

ravish ravish pe ye kāñTe to ḳhair kāñTe haiñ

yahāñ to lāla-o-gul kā bhī e.atibār nahīñ

rah-e-ḳhirad meñ ba-har-gām laakh kāñTe haiñ

junūñ kī raah meñ haa.il ye ḳhār-zār nahīñ

tumhārā dast-e-junūñ kyā abhī nahīñ uTThā

ta.ayyunāt ke parde jo taar taar nahīñ

ajiib haal hai is gulitān-e-hastī kā

kabhī bahār hai is meñ kabhī bahār nahīñ

vo dūsroñ ke liye kyā baneñge chashma-e-faiz

jo aap apne gunāhoñ pe sharmsār nahīñ

ye sang-o-ḳhisht jo hoñ mo'atabar to hoñ lekin

is aadmī kā bahar-hāl e.atibār nahīñ

ye āj-kal kī bahāreñ bhī rūh-farsā haiñ

vahīñ sukūñ hai ba-zāhir jahāñ bahār nahīñ

uThā ke jām-o-subū ḳhud uñDel lete haiñ

hamārī bazm meñ saaqī kā intizār nahīñ

ye dekhte ho jo 'amjad' ko mai-kada-bar-dosh

vo mai-farosh hai mai-nosh-o-mai-gusār nahīñ

ye dil jo dard-e-mohabbat se be-qarar nahin

wo subh-e-shauq nahin sham-e-intizar nahin

kisi nigah mein masti nahin KHumar nahin

ye koi aur hain saqi ye baada-KHwar nahin

tumhaari shaKH-e-nasheman mein barg-o-bar nahin

bahaar mein bhi tumhaare liye bahaar nahin

gulon ki ghunchon ki pazhmurdagi se zahir hai

chaman mein aaj bhi haalat sazgar nahin

rawish rawish pe ye kanTe to KHair kanTe hain

yahan to lala-o-gul ka bhi eatibar nahin

rah-e-KHirad mein ba-har-gam lakh kanTe hain

junun ki rah mein hail ye KHar-zar nahin

tumhaara dast-e-junun kya abhi nahin uTTha

tayyunat ke parde jo tar tar nahin

ajib haal hai is gulitan-e-hasti ka

kabhi bahaar hai is mein kabhi bahaar nahin

wo dusron ke liye kya banenge chashma-e-faiz

jo aap apne gunahon pe sharmsar nahin

ye sang-o-KHisht jo hon mo'atabar to hon lekin

is aadmi ka bahar-haal eatibar nahin

ye aaj-kal ki bahaaren bhi ruh-farsa hain

wahin sukun hai ba-zahir jahan bahaar nahin

uTha ke jam-o-subu KHud unDel lete hain

hamari bazm mein saqi ka intizar nahin

ye dekhte ho jo 'amjad' ko mai-kada-bar-dosh

wo mai-farosh hai mai-nosh-o-mai-gusar nahin