ye dil usi ki ek aahaT ke intizar mein hai

ye dil usī kī ik aahaT ke intizār meñ hai

jo sāmne hai magar parda-e-ġhubār meñ hai

maza taḌap kā ḳhalish aarzū kī yaas kā ġham

ḳhizāñ meñ lutf jo hai ḳhaak vo bahār meñ hai

kabhī na jis se huī ek bhī ḳhatā sarzad

jhukā.e sar vo sazā ke liye qatār meñ hai

añdherī raat meñ aḳhtar-shumāriyāñ to karo

samajh bhī jāoge kyā lutf intizār meñ hai

nahīñ ye zeb bashar lā-makāñ kī baat kare

hai dastaras se pare kab vo iḳhtiyār meñ hai

ye kāñTe baḌh ke jo dāman ko thaam lete haiñ

guloñ meñ hogī kashish pyaar sirf ḳhaar meñ hai

taḳhayyulāt meñ shāyad hai vasl kā manzar

qarār halkā sā muddat ke be-qarār meñ hai

maza to jab ho chaman ho sadā-bahār-e-misāl

jo mausamī ho tabassum vo kis shumār meñ hai

jidhar bhī dekhiye hai rang-o-bū fazā pe muhīt

tirī hañsī kā asar ab bhī lāla-zār meñ hai

khulī fazāoñ meñ rah kar bhī ham ne dekh liyā

vahī to baat hai jo sahn-e-parda-dār meñ hai

nafas nafas meñ ghuTan aur har taraf hai dhuāñ

fazā vo pahlī sī ab kaun se dayār meñ hai

ḳharīd paa.e jo is ko zamāna hai us kā

suno yahī to sadā vaqt kī pukār meñ hai

ye dil usi ki ek aahaT ke intizar mein hai

jo samne hai magar parda-e-ghubar mein hai

maza taDap ka KHalish aarzu ki yas ka gham

KHizan mein lutf jo hai KHak wo bahaar mein hai

kabhi na jis se hui ek bhi KHata sarzad

jhukae sar wo saza ke liye qatar mein hai

andheri raat mein aKHtar-shumariyan to karo

samajh bhi jaoge kya lutf intizar mein hai

nahin ye zeb bashar la-makan ki baat kare

hai dastaras se pare kab wo iKHtiyar mein hai

ye kanTe baDh ke jo daman ko tham lete hain

gulon mein hogi kashish pyar sirf KHar mein hai

taKHayyulat mein shayad hai wasl ka manzar

qarar halka sa muddat ke be-qarar mein hai

maza to jab ho chaman ho sada-bahaar-e-misal

jo mausami ho tabassum wo kis shumar mein hai

jidhar bhi dekhiye hai rang-o-bu faza pe muhit

teri hansi ka asar ab bhi lala-zar mein hai

khuli fazaon mein rah kar bhi hum ne dekh liya

wahi to baat hai jo sahn-e-parda-dar mein hai

nafas nafas mein ghuTan aur har taraf hai dhuan

faza wo pahli si ab kaun se dayar mein hai

KHarid pae jo is ko zamana hai us ka

suno yahi to sada waqt ki pukar mein hai