ye dil wo hai ki ghamon se jise faragh nahin

ye dil vo hai ki ġhamoñ se jise farāġh nahīñ

misāl laala se kyā duuñ kuchh ek daaġh nahīñ

galī meñ terī hī dil bar se gir paḌā dilbar

maiñ DhūñDūñ aur kahāñ jā kahīñ surāġh nahīñ

hai dāġh-e-ishq se raushan aur āh-e-sard se sard

hamāre dil kā to ḳhas-ḳhāna be-charāġh nahīñ

paḌā jahāñ tirā naqsh-e-qadam mire gul-rū

vo gul-zamīñ hai kahāñ jo ki bāġh-bāġh nahīñ

ai mere ġhuncha-dahan mere nargis-e-maḳhmūr

tire tamāshe kā mushtāq kaun baaġh nahīñ

hai kaun ġhuncha surāhī banā na tere huzūr

hai kaun phuul jo mai kā tire ayāġh nahīñ

kahāñ kā sher kahāñ kī ġhazal kahāñ kī bait

karūñ jo fikr bhī ab vo dil-o-dimāġh nahīñ

na 'azfarī' se karo nazm o nasr kā mazkūr

na jī kuchh in dinoñ apnā dimāġh chāġh nahīñ

ye dil wo hai ki ghamon se jise faragh nahin

misal lala se kya dun kuchh ek dagh nahin

gali mein teri hi dil bar se gir paDa dilbar

main DhunDun aur kahan ja kahin suragh nahin

hai dagh-e-ishq se raushan aur aah-e-sard se sard

hamare dil ka to KHas-KHana be-charagh nahin

paDa jahan tera naqsh-e-qadam mere gul-ru

wo gul-zamin hai kahan jo ki bagh-bagh nahin

ai mere ghuncha-dahan mere nargis-e-maKHmur

tere tamashe ka mushtaq kaun bagh nahin

hai kaun ghuncha surahi bana na tere huzur

hai kaun phul jo mai ka tere ayagh nahin

kahan ka sher kahan ki ghazal kahan ki bait

karun jo fikr bhi ab wo dil-o-dimagh nahin

na 'azfari' se karo nazm o nasr ka mazkur

na ji kuchh in dinon apna dimagh chagh nahin