ye duniya sang-dil aur bewafa hai

ye duniyā sang-dil aur bevafā hai

bhalā is ne kisī ko kyā diyā hai

ḳhudā hī hai nigahbāñ ab hamārā

yahāñ har-gām par fitna bapā hai

natīja hashr meñ is kā milegā

jahāñ meñ jis ne jo kuchh bhī kiyā hai

nibhāo va.ada vo roz-e-azal kā

ye mauqa umr bhar kā jo milā hai

karo duniyā meñ tum ehsān sab par

yahī tārīk rātoñ kā diyā hai

sila mehnat kā miltā hai jahāñ meñ

sivā is ke yahāñ par kyā milā hai

vahī maqbūl hai dargāh-e-rab meñ

amal vo nek jo tū ne kiyā hai

tirī ye jāñ-fishānī mard-e-momin

husūl-e-ḳhair kā behtar sila hai

sila ye hai ḳhulūs-e-dil kā be-shak

sukūñ se 'faiz' ab tak jī rahā hai

ye duniya sang-dil aur bewafa hai

bhala is ne kisi ko kya diya hai

KHuda hi hai nigahban ab hamara

yahan har-gam par fitna bapa hai

natija hashr mein is ka milega

jahan mein jis ne jo kuchh bhi kiya hai

nibhao wada wo roz-e-azal ka

ye mauqa umr bhar ka jo mila hai

karo duniya mein tum ehsan sab par

yahi tarik raaton ka diya hai

sila mehnat ka milta hai jahan mein

siwa is ke yahan par kya mila hai

wahi maqbul hai dargah-e-rab mein

amal wo nek jo tu ne kiya hai

teri ye jaan-fishani mard-e-momin

husul-e-KHair ka behtar sila hai

sila ye hai KHulus-e-dil ka be-shak

sukun se 'faiz' ab tak ji raha hai