ye fikr-o-fan ke fitne log ab aksar uThate hain

ye fikr-o-fan ke fitne log ab aksar uThāte haiñ

ujāle meñ to sub.ha raat meñ sāġhar uThāte haiñ

nahīñ hai tāqat-e-parvāz lekin hausla to hai

nigāheñ āsmāñ pe rakh ke bāl-o-par uThāte haiñ

ye maanā ham ne sabr-o-zabt ke aadī haiñ ham lekin

sitam had se guzar jaa.e to phir ḳhanjar uThāte haiñ

kabhī Thokar nahīñ khāte vo is duniyā-e-fānī meñ

jo apnā har qadam maulā kī marzī par uThāte haiñ

huā hai qatl muflis ke dil-e-armāñ kā duniyā meñ

tamannā.eñ thī phūloñ kī magar patthar uThāte haiñ

zamāne kā chalan hai is tarah badlā huā 'vāqif'

jhukā ke sar jo chalte the vahī ab sar uThāte haiñ

ye fikr-o-fan ke fitne log ab aksar uThate hain

ujale mein to subha raat mein saghar uThate hain

nahin hai taqat-e-parwaz lekin hausla to hai

nigahen aasman pe rakh ke baal-o-par uThate hain

ye mana hum ne sabr-o-zabt ke aadi hain hum lekin

sitam had se guzar jae to phir KHanjar uThate hain

kabhi Thokar nahin khate wo is duniya-e-fani mein

jo apna har qadam maula ki marzi par uThate hain

hua hai qatl muflis ke dil-e-arman ka duniya mein

tamannaen thi phulon ki magar patthar uThate hain

zamane ka chalan hai is tarah badla hua 'waqif'

jhuka ke sar jo chalte the wahi ab sar uThate hain