ye fitrat ki haqiqat hai jo jhuTlai nahin jati

ye fitrat kī haqīqat hai jo jhuTlā.ī nahīñ jaatī

hai kyā shai putlā-e-ḳhākī meñ jo paa.ī nahīñ jaatī

huzūr-e-husn meñ ye ishq kī ḳhuddāriyāñ nādāñ

tamannā arz kī jaatī hai farmā.ī nahīñ jaatī

mujhe ai dil usī kūche usī mahfil meñ phir le chal

tabī.at mai-kade meñ mujh se bahlā.ī nahīñ jaatī

mirā ronā mire bas meñ nahīñ hai nāseh-e-mushfiq

ghaTā ye ḳhud baras jaatī hai barsā.ī nahīñ jaatī

zarā sā guftugū meñ moḌ ho to chauñk uThtī huuñ

mirī dīvāngī se itnī dānā.ī nahīñ jaatī

na vo dīvāngī hai ab na vo sahrā na vo kāñTe

magar talvoñ se shān-e-ābla-pā.ī nahīñ jaatī

un āñkhoñ se ziyā-e-mehr kī ummīd ai 'rāje'

jin āñkhoñ meñ mohabbat kī ramaq paa.ī nahīñ jaatī

ye fitrat ki haqiqat hai jo jhuTlai nahin jati

hai kya shai putla-e-KHaki mein jo pai nahin jati

huzur-e-husn mein ye ishq ki KHuddariyan nadan

tamanna arz ki jati hai farmai nahin jati

mujhe ai dil usi kuche usi mahfil mein phir le chal

tabiat mai-kade mein mujh se bahlai nahin jati

mera rona mere bas mein nahin hai naseh-e-mushfiq

ghaTa ye KHud baras jati hai barsai nahin jati

zara sa guftugu mein moD ho to chaunk uThti hun

meri diwangi se itni danai nahin jati

na wo diwangi hai ab na wo sahra na wo kanTe

magar talwon se shan-e-abla-pai nahin jati

un aankhon se ziya-e-mehr ki ummid ai 'raje'

jin aankhon mein mohabbat ki ramaq pai nahin jati