ye gham rahega mere sath umr bhar shayad

ye ġham rahegā mire saath 'umr bhar shāyad

ye mere sabr-o-qanā'at kā hai samar shāyad

maiñ hañste hañste achānak se rone lagtī huuñ

mire mizāj pe mausam kā hai asar shāyad

koī umiid nahīñ hai tumhāre milne kī

mire nasīb meñ likkhā ho ye magar shāyad

vo mere dil se nikal hī nahīñ rahā logo

vo mere dil ko samajhtā hai apnā ghar shāyad

koī bhī shaḳhs mirī soch kā nahīñ miltā

mire junūn kā tanhā kaTe safar shāyad

maiñ yuuñ bhī she'r kī sūrat meñ baat kartī huuñ

ki merī baat meñ aa jaa.e kuchh asar shāyad

mile haiñ zaḳhm zamāne se jis qadar mujh ko

kisī ko zaḳhm mile hoñ na is qadar shāyad

vo mere dil kā talabgār hai na sūrat kā

vo chāhtā hai ḳhamīda mirā ye sar shāyad

to yās-o-ḳhauf kī shiddat se log mar jaate

agar ye lafz na hote kabhī agar shāyad

hamārī chhat pe parindoñ kā aanā jaanā hai

isī jagah pe kabhī thā koī shajar shāyad

ye tark-e-rabt-e-mohabbat tumhārā jurm nahīñ

tumhāre baḳht meñ thī hī nahīñ 'sahar' shāyad

ye gham rahega mere sath 'umr bhar shayad

ye mere sabr-o-qana'at ka hai samar shayad

main hanste hanste achanak se rone lagti hun

mere mizaj pe mausam ka hai asar shayad

koi umid nahin hai tumhaare milne ki

mere nasib mein likkha ho ye magar shayad

wo mere dil se nikal hi nahin raha logo

wo mere dil ko samajhta hai apna ghar shayad

koi bhi shaKHs meri soch ka nahin milta

mere junun ka tanha kaTe safar shayad

main yun bhi she'r ki surat mein baat karti hun

ki meri baat mein aa jae kuchh asar shayad

mile hain zaKHm zamane se jis qadar mujh ko

kisi ko zaKHm mile hon na is qadar shayad

wo mere dil ka talabgar hai na surat ka

wo chahta hai KHamida mera ye sar shayad

to yas-o-KHauf ki shiddat se log mar jate

agar ye lafz na hote kabhi agar shayad

hamari chhat pe parindon ka aana jaana hai

isi jagah pe kabhi tha koi shajar shayad

ye tark-e-rabt-e-mohabbat tumhaara jurm nahin

tumhaare baKHt mein thi hi nahin 'sahar' shayad