ye hadsa bhi dekh jo mujh pe guzar gaya

ye hādsa bhī dekh jo mujh pe guzar gayā

fasl-e-bahār aa.ī to dil kā shajar gayā

aisā huā sitam ki kahīñ ke nahīñ rahe

aisā huā karam ki mohabbat kā Dar gayā

gar dekhnā hai mo.ajiza parvāz kā tujhe

us ko fazā meñ dekh jo be-bāl-o-par gayā

mātam karūñ na kis liye maiñ aise shaḳhs kā

manzil to mil ga.ī jise zauq-e-safar gayā

ubhre baġhair chāñd bhī ab ke huā ġhurūb

ya.anī nasha chaḌhā bhī nahīñ aur utar gayā

pyāse ke paas kab bhalā paanī gayā kabhī

bādal ye kah ke pyāse ke sar se guzar gayā

ab maut kā bhī koī taqāzā na ho 'ḳhizar'

har shaḳhs zindagī ke taqāzoñ se mar gayā

ye hadsa bhi dekh jo mujh pe guzar gaya

fasl-e-bahaar aai to dil ka shajar gaya

aisa hua sitam ki kahin ke nahin rahe

aisa hua karam ki mohabbat ka Dar gaya

gar dekhna hai moajiza parwaz ka tujhe

us ko faza mein dekh jo be-baal-o-par gaya

matam karun na kis liye main aise shaKHs ka

manzil to mil gai jise zauq-e-safar gaya

ubhre baghair chand bhi ab ke hua ghurub

yani nasha chaDha bhi nahin aur utar gaya

pyase ke pas kab bhala pani gaya kabhi

baadal ye kah ke pyase ke sar se guzar gaya

ab maut ka bhi koi taqaza na ho 'KHizar'

har shaKHs zindagi ke taqazon se mar gaya