ye hai kaun si hikayat ye hai kaun sa tarana

ye hai kaun sī hikāyat ye hai kaun sā tarāna

na shikāyat-e-ġham-e-dil na hikāyat-e-zamāna

vo asar bharī nasīhat vo kalām-e-ārifāna

ki lagā rahā ho jaise koī dil pe tāziyāna

jise kāfirī se raġhbat jise zauq-e-mulhidāna

use kyuuñ pasand aa.e rah-o-rasm-e-momināna

hai sitam kī dhund chhā.ī hai jafā kī fasl aa.ī

hai chaman pe aisā pahrā ki qafas hai āshiyāna

mujhe yaad aa rahī haiñ tirī mahfiloñ kī bāteñ

vo shikāyatoñ kā daftar vo hikāyat-e-shabāna

tire hukm se alag ho tire nuur se judā ho

mirī zindagī meñ baaqī nahīñ aisā koī ḳhāna

nazar-e-karam se mujh ko kabhī dekh le vo shāyad

mire dil kī aarzū hai vo jamāl-e-jāvedāna

hai 'urūj' ye sa.ādat ye hai jail kī masarrat

ki tihāḌ meñ adā ho tirī iid kā dogānā

ye hai kaun si hikayat ye hai kaun sa tarana

na shikayat-e-gham-e-dil na hikayat-e-zamana

wo asar bhari nasihat wo kalam-e-arifana

ki laga raha ho jaise koi dil pe taziyana

jise kafiri se raghbat jise zauq-e-mulhidana

use kyun pasand aae rah-o-rasm-e-mominana

hai sitam ki dhund chhai hai jafa ki fasl aai

hai chaman pe aisa pahra ki qafas hai aashiyana

mujhe yaad aa rahi hain teri mahfilon ki baaten

wo shikayaton ka daftar wo hikayat-e-shabana

tere hukm se alag ho tere nur se juda ho

meri zindagi mein baqi nahin aisa koi KHana

nazar-e-karam se mujh ko kabhi dekh le wo shayad

mere dil ki aarzu hai wo jamal-e-jawedana

hai 'uruj' ye saadat ye hai jail ki masarrat

ki tihaD mein ada ho teri id ka dogana