ye hai meri nazron ki munajat ka aalam

ye hai mirī nazroñ kī munājāt kā aalam

zarre bhī dikhāte haiñ samāvāt kā aalam

pur-nūr tire husn se āġhosh-e-tasavvur

duurī meñ bhī hāsil hai mulāqāt kā aalam

iimā kā hai faizān ki ehsās kā ehsān

ek ek jafā meñ hai mudārāt kā aalam

jalvoñ kī ye kasrat hai ki hairān haiñ āñkheñ

ā.īne dikhāte haiñ hijābāt kā aalam

dil par nahīñ qaabū to zabāñ laakh ho bas meñ

nazroñ se jhalaktā hai ḳhayālāt kā aalam

har mauj-e-nafas un kī mahak se hai mo.attar

pinhāñ hai taġhāful meñ ināyāt kā aalam

kyā zikr-e-suḳhan un kī ḳhamoshī meñ bhī 'kaukab'

añgḌā.iyāñ letā hai kināyāt kā aalam

ye hai meri nazron ki munajat ka aalam

zarre bhi dikhate hain samawat ka aalam

pur-nur tere husn se aaghosh-e-tasawwur

duri mein bhi hasil hai mulaqat ka aalam

ima ka hai faizan ki ehsas ka ehsan

ek ek jafa mein hai mudaraat ka aalam

jalwon ki ye kasrat hai ki hairan hain aankhen

aaine dikhate hain hijabaat ka aalam

dil par nahin qabu to zaban lakh ho bas mein

nazron se jhalakta hai KHayalat ka aalam

har mauj-e-nafas un ki mahak se hai moattar

pinhan hai taghaful mein inayat ka aalam

kya zikr-e-suKHan un ki KHamoshi mein bhi 'kaukab'

angDaiyan leta hai kinayat ka aalam