ye hum jo harf-gazida kitab rakhte hain

ye ham jo harf-gazīda kitāb rakhte haiñ

isī meñ ahd-e-ziyāñ kā hisāb rakhte haiñ

hai apnī 'umr-e-guzishta hameñ 'azīz bahut

baġhal meñ pāra-e-'ahd-e-shabāb rakhte haiñ

to aur shaiḳh se kyā pūchhtā maiñ is ke sivā

sharāb thoḌī sī 'aalī janāb rakhte haiñ

isī pe takiya-nashīñ haiñ shahān-e-māh-o-nujūm

jo boriyā tire ḳhāna-ḳharāb rakhte haiñ

phir us meñ ārzū-o-justujū kā matlab kyā

vo zindagī jo misāl-e-habāb rakhte haiñ

hamārī mushk-e-mohabbat na ḳhushk hogī kabhī

sarishk-e-ḳhūñ se ise ham pur-āb rakhte haiñ

ab aur daulateñ kyā chāhiyeñ faqīroñ ko

na dil meñ ḳhauf na āñkhoñ meñ ḳhvāb rakhte haiñ

ye ahl-e-shahr bahut laa.e ḳhush-jamāloñ ko

kahāñ vo husn meñ terā javāb rakhte haiñ

ye kaise log haiñ haiñ to huzūr-e-shāh magar

diloñ meñ ārzū-e-inqilāb rakhte haiñ

ye hum jo harf-gazida kitab rakhte hain

isi mein ahd-e-ziyan ka hisab rakhte hain

hai apni 'umr-e-guzishta hamein 'aziz bahut

baghal mein para-e-'ahd-e-shabab rakhte hain

to aur shaiKH se kya puchhta main is ke siwa

sharab thoDi si 'ali janab rakhte hain

isi pe takiya-nashin hain shahan-e-mah-o-nujum

jo boriya tere KHana-KHarab rakhte hain

phir us mein aarzu-o-justuju ka matlab kya

wo zindagi jo misal-e-habab rakhte hain

hamari mushk-e-mohabbat na KHushk hogi kabhi

sarishk-e-KHun se ise hum pur-ab rakhte hain

ab aur daulaten kya chahiyen faqiron ko

na dil mein KHauf na aankhon mein KHwab rakhte hain

ye ahl-e-shahr bahut lae KHush-jamalon ko

kahan wo husn mein tera jawab rakhte hain

ye kaise log hain hain to huzur-e-shah magar

dilon mein aarzu-e-inqilab rakhte hain