ye hum jo hijr mein us ka KHayal bandhte hain

ye ham jo hijr meñ us kā ḳhayāl bāñdhte haiñ

havā kī shāḳh se bū-e-visāl bāñdhte haiñ

hamāre bas meñ kahāñ ziist ko suḳhan karnā

ye qāfiya faqat ahl-e-kamāl bāñdhte haiñ

ye ahd-e-jeb-tarāshāñ ko ab huā ma.alūm

yahāñ ke log girah meñ savāl bāñdhte haiñ

vo ḳhuub jānte haiñ ham-duā nihādoñ ko

hamāre haath ba-vaqt-e-zavāl bāñdhte haiñ

sabhī ko shauq-e-asīrī hai apnī apnī jagah

vo ham ko aur ham un kā ḳhayāl bāñdhte haiñ

tumheñ pata ho ki ham sāhiloñ ke parvarda

mohabbatoñ meñ bhī mazbūt jaal bāñdhte haiñ

phir us ke ba.ad kahīñ bhī vo jā nahīñ saktā

jise bhī bāñdhte haiñ ham kamāl bāñdhte haiñ

ye hum jo hijr mein us ka KHayal bandhte hain

hawa ki shaKH se bu-e-visal bandhte hain

hamare bas mein kahan zist ko suKHan karna

ye qafiya faqat ahl-e-kamal bandhte hain

ye ahd-e-jeb-tarashan ko ab hua malum

yahan ke log girah mein sawal bandhte hain

wo KHub jaante hain ham-dua nihadon ko

hamare hath ba-waqt-e-zawal bandhte hain

sabhi ko shauq-e-asiri hai apni apni jagah

wo hum ko aur hum un ka KHayal bandhte hain

tumhein pata ho ki hum sahilon ke parwarda

mohabbaton mein bhi mazbut jal bandhte hain

phir us ke baad kahin bhi wo ja nahin sakta

jise bhi bandhte hain hum kamal bandhte hain