ye hunar to teri taKHliq ki tashhir se hai

ye hunar to tirī taḳhlīq kī tash.hīr se hai

koī dīvār se hai aur koī tasvīr se hai

us ke inkār se zindān kī bū aa.egī

us ke lahje meñ tavāzun kisī zanjīr se hai

aap kā aur mirā kyā koī ta’āruf bhī nahīñ

jo yahāñ ho rahā hai kyā sabhī taqdīr se hai

jab tū chamkā to ziyā bāñTī ga.ī duniyā meñ

raushnī ko bhī basārat tirī tanvīr se hai

baap ne bachchoñ ko is tarh nishāñ batlā.e

ye virāsat se milī aur ye shamshīr se hai

rabt-e-tartīb kī ik shakl hai jaise ki 'zamān'

niiñd ko ḳhvāb se hai ḳhvāb ko ta.abīr se hai

ye hunar to teri taKHliq ki tashhir se hai

koi diwar se hai aur koi taswir se hai

us ke inkar se zindan ki bu aaegi

us ke lahje mein tawazun kisi zanjir se hai

aap ka aur mera kya koi ta’aruf bhi nahin

jo yahan ho raha hai kya sabhi taqdir se hai

jab tu chamka to ziya banTi gai duniya mein

raushni ko bhi basarat teri tanwir se hai

bap ne bachchon ko is tarh nishan batlae

ye wirasat se mili aur ye shamshir se hai

rabt-e-tartib ki ek shakl hai jaise ki 'zaman'

nind ko KHwab se hai KHwab ko tabir se hai