ye husn-e-tabassum ye kiran dekh rahi hai

ye husn-e-tabassum ye kiran dekh rahī hai

duniyā tirā andāz-e-suḳhan dekh rahī hai

shāyad ki hai ḳhurshīd kī niyyat meñ ḳharābī

kyoñ dhuup gulāboñ ke badan dekh rahī hai

armān-e-safar dhuup meñ jiine kā hai aadī

saa.e kī taraf dil kī thakan dekh rahī hai

hai manzar-e-hairat ki añdheroñ ko mirī aañkh

pahne hue kirnoñ kā kafan dekh rahī hai

jis roz se āñkheñ mirī ashkoñ se bharī haiñ

hairat se unheñ dil kī jalan dekh rahī hai

aao ki lahū daan kareñ is ke liye ham

hasrat se hameñ arz-e-vatan dekh rahī hai

'sajjād' hai be-kār tirā husn-e-takallum

duniyā tire māthe pe shikan dekh rahī hai

ye husn-e-tabassum ye kiran dekh rahi hai

duniya tera andaz-e-suKHan dekh rahi hai

shayad ki hai KHurshid ki niyyat mein KHarabi

kyon dhup gulabon ke badan dekh rahi hai

arman-e-safar dhup mein jine ka hai aadi

sae ki taraf dil ki thakan dekh rahi hai

hai manzar-e-hairat ki andheron ko meri aankh

pahne hue kirnon ka kafan dekh rahi hai

jis roz se aankhen meri ashkon se bhari hain

hairat se unhen dil ki jalan dekh rahi hai

aao ki lahu dan karen is ke liye hum

hasrat se hamein arz-e-watan dekh rahi hai

'sajjad' hai be-kar tera husn-e-takallum

duniya tere mathe pe shikan dekh rahi hai