ye imtihan-e-wafa hai ai dil gila na kar unki be-ruKHi ka

ye imtihān-e-vafā hai ai dil gila na kar un kī be-ruḳhī kā

taḌap se matlab fuġhāñ se hāsil vaqār kho degā āshiqī kā

hue jo mas.hūr-e-husn-e-rangīñ to zauq-e-sherī ne chuTkiyāñ liiñ

fareb-e-ulfat meñ aa ga.e ham to lag gayā rog shā.erī kā

na be-ḳhudī hai na hoshiyārī ajiib kuchh kaifiyat hai taarī

ḳhabar hai un kī na hosh apnā ye kaun sā ruḳh hai zindagī kā

bulā rahī haiñ hameñ bahāreñ vo gungunātī huī phuvāreñ

chalo kareñ mil ke sair-e-gulshan kabhī to maano kahā kisī kā

nazar rahī sab kī rang-o-bū par guzar gayā ham pe hashr 'jauhar'

kisī ne dekhā na shīsha-e-dil chaman meñ hañstī hui kalī kā

ye imtihan-e-wafa hai ai dil gila na kar un ki be-ruKHi ka

taDap se matlab fughan se hasil waqar kho dega aashiqi ka

hue jo mashur-e-husn-e-rangin to zauq-e-sheri ne chuTkiyan lin

fareb-e-ulfat mein aa gae hum to lag gaya rog shaeri ka

na be-KHudi hai na hoshiyari ajib kuchh kaifiyat hai tari

KHabar hai un ki na hosh apna ye kaun sa ruKH hai zindagi ka

bula rahi hain hamein bahaaren wo gungunati hui phuwaren

chalo karen mil ke sair-e-gulshan kabhi to mano kaha kisi ka

nazar rahi sab ki rang-o-bu par guzar gaya hum pe hashr 'jauhar'

kisi ne dekha na shisha-e-dil chaman mein hansti hui kali ka