ye ishq ajab lamha-e-tauqir hai jaanan

ye ishq ajab lamha-e-tauqīr hai jānāñ

ḳhud merā ḳhudā us kī hī tafsīr hai jānāñ

jo naam hathelī kī lakīroñ meñ nahīñ thā

kyuuñ aaj talak dil pe vo tahrīr hai jānāñ

us ḳhvāb kī ta.abīr to mumkin hī nahīñ thī

āñkhoñ meñ magar us kī hī tāsīr hai jānāñ

maanā ki tire hāthoñ meñ haiñ phuul abhī tak

lekin tire pairoñ meñ jo zanjīr hai jānāñ

kyā jāniye kis roz bikhar jaa.e kahīñ bhī

is aas kī dil meñ jo ik tanvīr hai jānāñ

ye rog kahīñ mujh ko hī mismār na kar de

aa lauT kar aa tū hī to iksīr hai jānāñ

tū hijr meñ Duubī huī nayyā kā kināra

jīvan kī tire paas hī tadbīr hai jānāñ

ye zaḳhm judā.ī ke kabhī silne nahīñ haiñ

tū jaan le apnī yahī taqdīr hai jānāñ

us aag ke sho.aloñ meñ vo phūloñ kā tabassum

ik sajda-e-be-misl kī tasvīr hai jānāñ

ab din kī talab hī nahīñ 'shāhīn' mujhe to

ik shaam hī ab to mirī jāgīr hai jānāñ

ye ishq ajab lamha-e-tauqir hai jaanan

KHud mera KHuda us ki hi tafsir hai jaanan

jo nam hatheli ki lakiron mein nahin tha

kyun aaj talak dil pe wo tahrir hai jaanan

us KHwab ki tabir to mumkin hi nahin thi

aankhon mein magar us ki hi tasir hai jaanan

mana ki tere hathon mein hain phul abhi tak

lekin tere pairon mein jo zanjir hai jaanan

kya jaaniye kis roz bikhar jae kahin bhi

is aas ki dil mein jo ek tanwir hai jaanan

ye rog kahin mujh ko hi mismar na kar de

aa lauT kar aa tu hi to iksir hai jaanan

tu hijr mein Dubi hui nayya ka kinara

jiwan ki tere pas hi tadbir hai jaanan

ye zaKHm judai ke kabhi silne nahin hain

tu jaan le apni yahi taqdir hai jaanan

us aag ke shoalon mein wo phulon ka tabassum

ek sajda-e-be-misl ki taswir hai jaanan

ab din ki talab hi nahin 'shahin' mujhe to

ek sham hi ab to meri jagir hai jaanan