ye itr be-ziyan nahin nasim-e-nau-bahaar ki

ye itr be-ziyāñ nahīñ nasīm-e-nau-bahār kī

uḌā ke laa.ī hai sabā shamīm zulf-e-yār kī

bas itnī kā.enāt hai hayāt-e-musta.ār kī

shabāb hai habāb kā bahār hai sharār kī

fareb-kāriyāñ na pūchh josh-e-intizār kī

tamām shab sunā kiye sadā ḳhirām-e-yār kī

ye muḳhtasar sī dāstāñ hai jabr-o-iḳhtiyār kī

karishma-sāz koī ho ḳhatā gunāhgār kī

haqīqat-e-fareb-e-husn aalam āshkār kī

ye ibtidā-e-fatah hai junūn-e-puḳhta-kār kī

mujhe to aañkh khulte hī qafas kī tīliyāñ milīñ

mirī balā se gar chaman meñ fasl hai bahār kī

tire nisār zaḳhm-e-ishq kuchh vo lazzateñ milīñ

balā.eñ le rahā hai dil ḳhadañg-e-jāñ-shikār kī

rah-e-talab kī lazzateñ haiñ aur himmat āfrīñ

ye talḳhiyāñ haiñ talḳhiyāñ sharāb-e-ḳhush-gavār kī

'suhail' terī shā.irī hai yā fusūn-e-sāmarī

ravāniyāñ haiñ nazm meñ ḳhirām-e-jū-e-yār kī

ye itr be-ziyan nahin nasim-e-nau-bahaar ki

uDa ke lai hai saba shamim zulf-e-yar ki

bas itni kaenat hai hayat-e-mustaar ki

shabab hai habab ka bahaar hai sharar ki

fareb-kariyan na puchh josh-e-intizar ki

tamam shab suna kiye sada KHiram-e-yar ki

ye muKHtasar si dastan hai jabr-o-iKHtiyar ki

karishma-saz koi ho KHata gunahgar ki

haqiqat-e-fareb-e-husn aalam aashkar ki

ye ibtida-e-fatah hai junun-e-puKHta-kar ki

mujhe to aankh khulte hi qafas ki tiliyan milin

meri bala se gar chaman mein fasl hai bahaar ki

tere nisar zaKHm-e-ishq kuchh wo lazzaten milin

balaen le raha hai dil KHadang-e-jaan-shikar ki

rah-e-talab ki lazzaten hain aur himmat aafrin

ye talKHiyan hain talKHiyan sharab-e-KHush-gawar ki

'suhail' teri shairi hai ya fusun-e-samari

rawaniyan hain nazm mein KHiram-e-ju-e-yar ki