ye ittifaq tha hum aa gae ujale mein

ye ittifāq thā ham aa ga.e ujāle meñ

chhupe the varna hazāroñ hī ġhaar raste meñ

zarā pukārtī rahnā mujhe bhī gardish-e-nau

maiñ kho na jā.ūñ kahīñ zindagī ke mele meñ

vahī añdhere bane haiñ rafīq-e-jāda-e-zīst

gale mile the kabhī jin se ham jo dhoke meñ

ravish ravish pe jo raqsāñ ho raag sho.aloñ kā

kashish kahāñ se phir aa.e vafā ke naġhme meñ

jabīn-e-shab se siyāhī sameTne vaalo

hazāroñ raaz nihāñ haiñ sahar ke siine meñ

ye dil kī aag hai bhaḌkī hai aur bhaḌkegī

talāsh-e-fikr-e-sukūñ aur vo bhī sho'le meñ

mujhe sikhāo na ādāb-e-zabt-e-ġham yaaro

ki merī umr kaTī hai ġhamoñ ke saa.e meñ

na koī saaya na aahaT na naqsh-e-pā 'at.har'

kise pukārte rahte ho tum añdhere meñ

ye ittifaq tha hum aa gae ujale mein

chhupe the warna hazaron hi ghaar raste mein

zara pukarti rahna mujhe bhi gardish-e-nau

main kho na jaun kahin zindagi ke mele mein

wahi andhere bane hain rafiq-e-jada-e-zist

gale mile the kabhi jin se hum jo dhoke mein

rawish rawish pe jo raqsan ho rag shoalon ka

kashish kahan se phir aae wafa ke naghme mein

jabin-e-shab se siyahi sameTne walo

hazaron raaz nihan hain sahar ke sine mein

ye dil ki aag hai bhaDki hai aur bhaDkegi

talash-e-fikr-e-sukun aur wo bhi sho'le mein

mujhe sikhao na aadab-e-zabt-e-gham yaro

ki meri umr kaTi hai ghamon ke sae mein

na koi saya na aahaT na naqsh-e-pa 'athar'

kise pukarte rahte ho tum andhere mein