ye jahan-e-rang-o-bu apni jagah

ye jahān-e-rang-o-bū apnī jagah

aur tujh se guftugū apnī jagah

terī nisbat se lagī bād-e-sabā

shahr tere chaltī lū apnī jagah

kis tarah de duuñ fazīlat ek ko

ishq merā aur tū apnī jagah

hai mirī ḳhvāhish ki tū hañstā rahe

zaḳhm mere be-rafū apnī jagah

haiñ bahut kāfir tire nāz-o-adā

aañkh merī bā-vuzū apnī jagah

har jagah tū ḳhud nahīñ ai rashk-e-māh

husn terā chār-sū apnī jagah

muskurāhaT se tirī mahkā chaman

sab khile phūloñ kī bū apnī jagah

ishq ko baḳhshī hai kitnī aabrū

qais ḳhud be-ābrū apnī jagah

terī chāhat kā bhī hai apnā maqām

aur ḳhud kī justujū apnī jagah

ḳhaak meñ maiñ mil gayā tere liye

vo merā jazb-e-numū apnī jagah

har taraf saa.e hī saa.e the 'ḳhizar'

par tire saa.e kī ḳhū apnī jagah

ye jahan-e-rang-o-bu apni jagah

aur tujh se guftugu apni jagah

teri nisbat se lagi baad-e-saba

shahr tere chalti lu apni jagah

kis tarah de dun fazilat ek ko

ishq mera aur tu apni jagah

hai meri KHwahish ki tu hansta rahe

zaKHm mere be-rafu apni jagah

hain bahut kafir tere naz-o-ada

aankh meri ba-wuzu apni jagah

har jagah tu KHud nahin ai rashk-e-mah

husn tera chaar-su apni jagah

muskurahaT se teri mahka chaman

sab khile phulon ki bu apni jagah

ishq ko baKHshi hai kitni aabru

qais KHud be-abru apni jagah

teri chahat ka bhi hai apna maqam

aur KHud ki justuju apni jagah

KHak mein main mil gaya tere liye

wo mera jazb-e-numu apni jagah

har taraf sae hi sae the 'KHizar'

par tere sae ki KHu apni jagah