یہ جہان رنگ و بو اپنی جگہ

یہ جہان رنگ و بو اپنی جگہ

اور تجھ سے گفتگو اپنی جگہ

تیری نسبت سے لگی باد صبا

شہر تیرے چلتی لو اپنی جگہ

کس طرح دے دوں فضیلت ایک کو

عشق میرا اور تو اپنی جگہ

ہے مری خواہش کہ تو ہنستا رہے

زخم میرے بے رفو اپنی جگہ

ہیں بہت کافر ترے ناز و ادا

آنکھ میری با وضو اپنی جگہ

ہر جگہ تو خود نہیں اے رشک ماہ

حسن تیرا چار سو اپنی جگہ

مسکراہٹ سے تری مہکا چمن

سب کھلے پھولوں کی بو اپنی جگہ

عشق کو بخشی ہے کتنی آبرو

قیس خود بے آبرو اپنی جگہ

تیری چاہت کا بھی ہے اپنا مقام

اور خود کی جستجو اپنی جگہ

خاک میں میں مل گیا تیرے لئے

وہ مرا جذب نمو اپنی جگہ

ہر طرف سائے ہی سائے تھے خضرؔ

پر ترے سائے کی خو اپنی جگہ