ye jitne shikwe gile hain inhen miTa kar ja

ye jitne shikve gile haiñ inheñ miTā kar jā

tū jaanā chāhtā hai to gale lagā kar jā

maiñ bhuul jā.ūñ tujhe yā maiñ intizār karūñ

tū apne jaane se pahle mujhe batā kar jā

ye mere paas rahe to maiñ jī na pā.ūñgī

tū mere sāmne apne ye ḳhat jalā kar jā

maiñ tere baad kabhī DhūñDh hī na pā.ūñ tujhe

yuuñ apne aap ko mujh meñ kahīñ chhupā kar jā

hamāre biich kā ye fāsla mukammal ho

abhī talak kī sabhī qurbateñ miTā kar jā

bache-khuche ye charāġhoñ ko bhī bujhā de ab

ki merī shab ke añdheroñ ko tū baḌhā kar jā

maiñ tujh ko ḳhvāb meñ bhī ab kabhī nahīñ dekhūñ

tū jā rahā hai to nīñdeñ mirī uḌā kar jā

ye jitne shikwe gile hain inhen miTa kar ja

tu jaana chahta hai to gale laga kar ja

main bhul jaun tujhe ya main intizar karun

tu apne jaane se pahle mujhe bata kar ja

ye mere pas rahe to main ji na paungi

tu mere samne apne ye KHat jala kar ja

main tere baad kabhi DhunDh hi na paun tujhe

yun apne aap ko mujh mein kahin chhupa kar ja

hamare bich ka ye fasla mukammal ho

abhi talak ki sabhi qurbaten miTa kar ja

bache-khuche ye charaghon ko bhi bujha de ab

ki meri shab ke andheron ko tu baDha kar ja

main tujh ko KHwab mein bhi ab kabhi nahin dekhun

tu ja raha hai to ninden meri uDa kar ja