ye jo ahbab hain mere sabhi katrane lagte hain

ye jo ahbāb haiñ mere sabhī katrāne lagte haiñ

na jaane is ġharībī se ye kyoñ ghabrāne lagte haiñ

jo sach kahtā huuñ maiñ to kyoñ burā lagtā hai logoñ ko

har ik jānib se jo patthar mire ghar aane lagte haiñ

jo qātil haiñ vo phirte haiñ sharīfoñ kī tarah lekin

sitam kyoñ be-gunāhoñ par sitam-gar Dhāne lagte haiñ

amīr-e-shahr jab dekho paḌā hai aish-o-ishrat meñ

ġharībī ke magar din kab use yaad aane lagte haiñ

guzārī saath meñ jin ke ḳhushī kī har ghaḌī maiñ ne

na jaane kyoñ mire mahbūb ab sharmāne lagte haiñ

burā.ī is qadar duniyā meñ baḌhtī jaa.e hai 'yāsīn'

jidhar dekho udhar maiḳhāne hī maiḳhāne lagte haiñ

ye jo ahbab hain mere sabhi katrane lagte hain

na jaane is gharibi se ye kyon ghabrane lagte hain

jo sach kahta hun main to kyon bura lagta hai logon ko

har ek jaanib se jo patthar mere ghar aane lagte hain

jo qatil hain wo phirte hain sharifon ki tarah lekin

sitam kyon be-gunahon par sitam-gar Dhane lagte hain

amir-e-shahr jab dekho paDa hai aish-o-ishrat mein

gharibi ke magar din kab use yaad aane lagte hain

guzari sath mein jin ke KHushi ki har ghaDi main ne

na jaane kyon mere mahbub ab sharmane lagte hain

burai is qadar duniya mein baDhti jae hai 'yasin'

jidhar dekho udhar maiKHane hi maiKHane lagte hain