ye jo ishq-e-masnad ke log hain unhen ramz sare sikha piya

ye jo ishq-e-masnad ke log haiñ unheñ ramz saare sikhā piyā

ye junūn-e-ishq kī dāstāñ unheñ harf harf sunā piyā

mire chārāgar maiñ huuñ dar-ba-dar maiñ to thak ga.ī hai ajab safar

mirī be-nishāñ sī haiñ manzileñ mujhe rāsta bhī dikhā piyā

na hudūd meñ na quyūd meñ mirā dil tire hī vajūd meñ

ye sujūd kā hasīñ pairahan mirī ruuh par to sajā piyā

maiñ to aas thī maiñ to pyaas thī kisī phuul kī maiñ bhī baas thī

mirī pattiyāñ gireñ jā-ba-jā unheñ shāḳh par to sajā piyā

maiñ faqīr huuñ maiñ haqīr huuñ kisī ḳhvāb kī na asiir huuñ

maiñ aziiz huuñ to tujhe hī bas so azīz-tar hī banā piyā

maiñ falak se aa.ī ḳhatā mirī use DhūñDnā hai vafā mirī

ye jafā kī jo haiñ haqīqateñ mirī aañkh ko vo dikhā piyā

mire āsmāñ mire sā.ebāñ tū hī rāz-dāñ tū hī mehrbāñ

jahāñ lā-makāñ ke haiñ silsile vahīñ merā ghar bhī banā piyā

ye jo ārzūoñ kā des hai ye jo ḳhaak ḳhaak sā bhes hai

jo azal abad kā ye bhed hai use bhed hī meñ batā piyā

ye qadam qadam pe bashārateñ ye nazar nazar meñ ziyārateñ

ye basārteñ ye bujhārteñ mire shahr-e-dil ko dikhā piyā

ye jo mere man meñ hai raushnī yahī zindagī yahī bandagī

mirī fikr meñ tire zikr meñ jo charāġh haiñ vo jalā piyā

ye jo ishq-e-masnad ke log hain unhen ramz sare sikha piya

ye junun-e-ishq ki dastan unhen harf harf suna piya

mere chaaragar main hun dar-ba-dar main to thak gai hai ajab safar

meri be-nishan si hain manzilen mujhe rasta bhi dikha piya

na hudud mein na quyud mein mera dil tere hi wajud mein

ye sujud ka hasin pairahan meri ruh par to saja piya

main to aas thi main to pyas thi kisi phul ki main bhi bas thi

meri pattiyan giren ja-ba-ja unhen shaKH par to saja piya

main faqir hun main haqir hun kisi KHwab ki na asir hun

main aziz hun to tujhe hi bas so aziz-tar hi bana piya

main falak se aai KHata meri use DhunDna hai wafa meri

ye jafa ki jo hain haqiqaten meri aankh ko wo dikha piya

mere aasman mere saeban tu hi raaz-dan tu hi mehrban

jahan la-makan ke hain silsile wahin mera ghar bhi bana piya

ye jo aarzuon ka des hai ye jo KHak KHak sa bhes hai

jo azal abad ka ye bhed hai use bhed hi mein bata piya

ye qadam qadam pe bashaaraten ye nazar nazar mein ziyaraten

ye basarten ye bujhaarten mere shahr-e-dil ko dikha piya

ye jo mere man mein hai raushni yahi zindagi yahi bandagi

meri fikr mein tere zikr mein jo charagh hain wo jala piya