ye jo lauTi hai charaghon ko bujha ke pichhe

ye jo lauTī hai charāġhoñ ko bujhā ke pīchhe

hausle aur kisī ke haiñ havā ke pīchhe

chhoḌ kar itnī hasīñ duniyā ko dīvāne log

jaane kyā dekhne jaate haiñ qazā ke pīchhe

Thiik hai us ne duā dī hai tumheñ bhī lekin

us kī ḳhvāhish bhī pata karnā duā ke pīchhe

kaam itnī to chalo aa ga.ī goyā.ī mirī

us kī ḳhushbū hai chalī aa.ī sadā ke pīchhe

us kā paiġhām samajh paa.e nahīñ aur nādāñ

qatl karne lage logoñ ko ḳhudā ke pīchhe

jab bhī chāhūñ ki baḌhūñ aage to maazī kī ye mauj

le ke jaatī hai mujhe aur bahā ke pīchhe

muntazir jis ke the ham ek zamāne se vo

raushnī laa.ī añdheroñ ko chhupā ke pīchhe

tum ko kyā ilm miTā kitne hī qatroñ kā vajūd

muskurātī huī is ek ghaTā ke pīchhe

log ye TuuTe hue yuuñ bhī anā rakhte haiñ

kyūñki chhup jaatā hai bikhrāv anā ke pīchhe

ye jo lauTi hai charaghon ko bujha ke pichhe

hausle aur kisi ke hain hawa ke pichhe

chhoD kar itni hasin duniya ko diwane log

jaane kya dekhne jate hain qaza ke pichhe

Thik hai us ne dua di hai tumhein bhi lekin

us ki KHwahish bhi pata karna dua ke pichhe

kaam itni to chalo aa gai goyai meri

us ki KHushbu hai chali aai sada ke pichhe

us ka paigham samajh pae nahin aur nadan

qatl karne lage logon ko KHuda ke pichhe

jab bhi chahun ki baDhun aage to mazi ki ye mauj

le ke jati hai mujhe aur baha ke pichhe

muntazir jis ke the hum ek zamane se wo

raushni lai andheron ko chhupa ke pichhe

tum ko kya ilm miTa kitne hi qatron ka wajud

muskuraati hui is ek ghaTa ke pichhe

log ye TuTe hue yun bhi ana rakhte hain

kyunki chhup jata hai bikhraw ana ke pichhe