ye justuju hai ki dariya-e-moatabar mil jae

ye justujū hai ki dariyā-e-mo'atabar mil jaa.e

vagarna pyaas ko sahrā-e-ḳhushk tar mil jaa.e

kabhī na ḳhatm ho aisā koī safar mil jaa.e

jo na-shanās-e-safar ho vo rah-guzar mil jaa.e

junūn-e-shauq ne chhānī hai ḳhaak dar dar kī

ye soch kar ki kahīñ ḳhizr dar-ba-dar mil jaa.e

shikast-e-tīra-shabī kā koī surāġh mile

maiñ shab kuredūñ to shāyad koī sahar mil jaa.e

jabīn-e-nāz kā har zaḳhm phir chaTaḳhne lagā

ai nā-murādī-e-dil ab to sang-e-dar mil jaa.e

havas-guzār hai bezārī-e-sukūn-e-dil

koī to zarb lage koī to zarar mil jaa.e

dayār-e-fikr meñ utre koī nayā sūraj

tire ḳhayāl se fursat hameñ agar mil jaa.e

kase jo fan kī kasauTī pe mujh ko ai 'sālim'

kahīñ to aisā koī sāhib-e-nazar mil jaa.e

ye justuju hai ki dariya-e-mo'atabar mil jae

wagarna pyas ko sahra-e-KHushk tar mil jae

kabhi na KHatm ho aisa koi safar mil jae

jo na-shanas-e-safar ho wo rah-guzar mil jae

junun-e-shauq ne chhani hai KHak dar dar ki

ye soch kar ki kahin KHizr dar-ba-dar mil jae

shikast-e-tira-shabi ka koi suragh mile

main shab kuredun to shayad koi sahar mil jae

jabin-e-naz ka har zaKHm phir chaTaKHne laga

ai na-muradi-e-dil ab to sang-e-dar mil jae

hawas-guzar hai bezari-e-sukun-e-dil

koi to zarb lage koi to zarar mil jae

dayar-e-fikr mein utre koi naya suraj

tere KHayal se fursat hamein agar mil jae

kase jo fan ki kasauTi pe mujh ko ai 'salim'

kahin to aisa koi sahib-e-nazar mil jae