ye kar-gah-e-KHair bhi hai bazm-e-shar bhi hai

ye kār-gāh-e-ḳhair bhī hai bazm-e-shar bhī hai

duniyā qayām-gāh bhī hai rahguzar bhī hai

kyā jaane kis kī fat.h ho kis kī shikast ho

ka.aba bhī hai nazar meñ tirā sang-e-dar bhī hai

ye aur baat hai ki tasarruf na kar sakūñ

qabze meñ mere shaam bhī hai aur sahar bhī hai

matlab ye hai jafā kā vafāoñ ke saath saath

merā ḳhayāl bhī hai zamāne kā Dar bhī hai

itne baḌe jahāñ meñ ġharīboñ ke vāste

yā-rab sukūn-e-dil kā koī mustaqar bhī hai

kis tarah sarguzisht-e-mohabbat bayāñ karūñ

ye dāstāñ tavīl bhī hai muḳhtasar bhī hai

uTh aur apne farz ko pahchān be-ḳhabar

duniyā badal ga.ī hai tujhe kuchh ḳhabar bhī hai

donoñ ko gum kiyā hai ḳhyāl-o-shabāb ne

vo kaif-e-be-ḳhudī jo idhar hai udhar bhī hai

kal the jahāñ pe aaj bhī tum ho vahīñ 'nihāl'

duniyā pahuñch ga.ī hai kahāñ kuchh ḳhabar bhī hai

ye kar-gah-e-KHair bhi hai bazm-e-shar bhi hai

duniya qayam-gah bhi hai rahguzar bhi hai

kya jaane kis ki fath ho kis ki shikast ho

kaba bhi hai nazar mein tera sang-e-dar bhi hai

ye aur baat hai ki tasarruf na kar sakun

qabze mein mere sham bhi hai aur sahar bhi hai

matlab ye hai jafa ka wafaon ke sath sath

mera KHayal bhi hai zamane ka Dar bhi hai

itne baDe jahan mein gharibon ke waste

ya-rab sukun-e-dil ka koi mustaqar bhi hai

kis tarah sarguzisht-e-mohabbat bayan karun

ye dastan tawil bhi hai muKHtasar bhi hai

uTh aur apne farz ko pahchan be-KHabar

duniya badal gai hai tujhe kuchh KHabar bhi hai

donon ko gum kiya hai KHyal-o-shabab ne

wo kaif-e-be-KHudi jo idhar hai udhar bhi hai

kal the jahan pe aaj bhi tum ho wahin 'nihaal'

duniya pahunch gai hai kahan kuchh KHabar bhi hai