ye kah do to duniya wale nile pile hote hain

ye kah do to duniyā vaale niile piile hote haiñ

is duniyā ke sāñp-sañpole sab zahrīle hote haiñ

ai mere mahbūb batā ye husn kī rangat kitne din

patjhaḌ meñ girne se pahle patte piile hote haiñ

ḳhud hī rakh dete haiñ bande sar jin kī talvāroñ par

jaane ye kyā baat hai un ke nain haTīle hote haiñ

tishna yā sairāb ho rindo maiḳhāne kī ḳhair manāo

ashkoñ se yā mai se apne hoñT to giile hote haiñ

naaz kā un ke jo aalam hai kaun sune aur kaun kahe

ik pal darshan dene ko bhī lākhoñ hiile hote haiñ

dil le kar jo ġham dete haiñ ulfat ke dīvānoñ ko

pahle pahle ye zālim kitne sharmīle hote haiñ

miit unhīñ ke hote haiñ sab jiit unhīñ kī hotī hai

is duniyā meñ jin logoñ ke paas vasīle hote haiñ

nafrat kī ḳhū ho yā jin se naḳhvat kī sī bū aa.e

kaḌvī hotī haiñ bāteñ vo bol kasīle hote haiñ

'manzil' kis ke pyaar kī sardī garmī mujh par guzrī hai

rāteñ aag lagātī haiñ aur din barfīle hote haiñ

ye kah do to duniya wale nile pile hote hain

is duniya ke sanp-sanpole sab zahrile hote hain

ai mere mahbub bata ye husn ki rangat kitne din

patjhaD mein girne se pahle patte pile hote hain

KHud hi rakh dete hain bande sar jin ki talwaron par

jaane ye kya baat hai un ke nain haTile hote hain

tishna ya sairab ho rindo maiKHane ki KHair manao

ashkon se ya mai se apne honT to gile hote hain

naz ka un ke jo aalam hai kaun sune aur kaun kahe

ek pal darshan dene ko bhi lakhon hile hote hain

dil le kar jo gham dete hain ulfat ke diwanon ko

pahle pahle ye zalim kitne sharmile hote hain

mit unhin ke hote hain sab jit unhin ki hoti hai

is duniya mein jin logon ke pas wasile hote hain

nafrat ki KHu ho ya jin se naKHwat ki si bu aae

kaDwi hoti hain baaten wo bol kasile hote hain

'manzil' kis ke pyar ki sardi garmi mujh par guzri hai

raaten aag lagati hain aur din barfile hote hain