ye kah ke aag wo dil mein lagae jate hain

ye kah ke aag vo dil meñ lagā.e jaate haiñ

charāġh ḳhud nahīñ jalte jalā.e jaate haiñ

ab is se baḌh ke sitam dostoñ pe kyā hogā

vo dushmanoñ ko gale se lagā.e jaate haiñ

ġharībī jurm hai aisā ki dekh kar mujh ko

nigāheñ pher ke apne parā.e jaate haiñ

kashish charāġh kī ye baat kar ga.ī raushan

patiñge ḳhud nahīñ aate bulā.e jaate haiñ

tajalliyoñ ke hijābāt haiñ ḳhayāl rahe

ye parde dast-e-nazar se uThā.e jaate haiñ

hameñ milī hai jagah jab se aap ke dil meñ

jahāñ haiñ aap vahāñ ham bhī paa.e jaate haiñ

na pūchh hāl-e-shab-e-ġham na pūchh ai 'purnam'

bahā.e jaate haiñ aañsū bahā.e jaate haiñ

ye kah ke aag wo dil mein lagae jate hain

charagh KHud nahin jalte jalae jate hain

ab is se baDh ke sitam doston pe kya hoga

wo dushmanon ko gale se lagae jate hain

gharibi jurm hai aisa ki dekh kar mujh ko

nigahen pher ke apne parae jate hain

kashish charagh ki ye baat kar gai raushan

patinge KHud nahin aate bulae jate hain

tajalliyon ke hijabaat hain KHayal rahe

ye parde dast-e-nazar se uThae jate hain

hamein mili hai jagah jab se aap ke dil mein

jahan hain aap wahan hum bhi pae jate hain

na puchh haal-e-shab-e-gham na puchh ai 'purnam'

bahae jate hain aansu bahae jate hain