ye kaha usne mere shauq ke afsane par

ye kahā us ne mire shauq ke afsāne par

be-adab sham.a kahīñ girtī hai parvāne par

aan dilvāte ho rakh rakh ke jo parvāne par

choT aa.e na kahīñ zabt ke paimāne par

un se kah de koī vo aa ke tamāshā dekheñ

phuul barsāte haiñ log aap ke dīvāne par

muḌ ke rahmat kī taraf kī jo nazar mastoñ ne

aa gayā abr-e-siyah jhuum ke mai-ḳhāne par

yaad TuuTā huā dil aa gayā pahroñ ro.e

paḌ ga.ī aañkh jo TuuTe hue paimāne par

khiñch ga.ī sub.h-e-qayāmat kī mujassam tasvīr

aa gayā Dhal ke dupaTTā jo kabhī shāne par

yaad aaya koī nākām-e-tamannā 'muztar'

ro diye aaj vo kyoñ qais ke afsāne par

ye kaha us ne mere shauq ke afsane par

be-adab shama kahin girti hai parwane par

aan dilwate ho rakh rakh ke jo parwane par

choT aae na kahin zabt ke paimane par

un se kah de koi wo aa ke tamasha dekhen

phul barsate hain log aap ke diwane par

muD ke rahmat ki taraf ki jo nazar maston ne

aa gaya abr-e-siyah jhum ke mai-KHane par

yaad TuTa hua dil aa gaya pahron roe

paD gai aankh jo TuTe hue paimane par

khinch gai subh-e-qayamat ki mujassam taswir

aa gaya Dhal ke dupaTTa jo kabhi shane par

yaad aaya koi nakaam-e-tamanna 'muztar'

ro diye aaj wo kyon qais ke afsane par