ye kahan ki ulfat hai dur-dur rahte ho

ye kahāñ kī ulfat hai dūr-dūr rahte ho

mere to na ban paa.e mujh ko apnā kahte ho

mil ke baañT leñge ham ranj aur ḳhushī apnī

dard phir jo hotā hai kyoñ akelā sahte ho

merā kuchh kahā tere dil ko lag gayā shāyad

baat bhī nahīñ karte kho.e kho.e rahte ho

mujh se jo shikāyat hai mujh se hī kaho mil ke

ġhair se hī milte ho ġhair se hī kahte ho

Thes jab bhī lagtī hai merā dil dhaḌaktā hai

tum judā na ho jaao chashm-e-tar meñ rahte ho

kis tarah milūñ tum se ek jā nahīñ rukte

āñdhiyoñ se chalte ho misl-e-dariyā bahte ho

us ne ye kahā 'sāgar' sun ke merī ġhazloñ ko

kar diyā hai dil-dāda sher aise kahte ho

ye kahan ki ulfat hai dur-dur rahte ho

mere to na ban pae mujh ko apna kahte ho

mil ke banT lenge hum ranj aur KHushi apni

dard phir jo hota hai kyon akela sahte ho

mera kuchh kaha tere dil ko lag gaya shayad

baat bhi nahin karte khoe khoe rahte ho

mujh se jo shikayat hai mujh se hi kaho mil ke

ghair se hi milte ho ghair se hi kahte ho

Thes jab bhi lagti hai mera dil dhaDakta hai

tum juda na ho jao chashm-e-tar mein rahte ho

kis tarah milun tum se ek ja nahin rukte

aandhiyon se chalte ho misl-e-dariya bahte ho

us ne ye kaha 'sagar' sun ke meri ghazlon ko

kar diya hai dil-dada sher aise kahte ho