ye kaisa ghar hai ki jis mein koi kitab nahin

ye kaisā ghar hai ki jis meñ koī kitāb nahīñ

siyāh raat hai jis meñ ki māhtāb nahīñ

qusūr terā hai us ko na dekh paa.e agar

ḳhudā kī zaat pe varna koī hijāb nahīñ

vo ḳhaak meñ na milā de kahīñ ḳhafā ho kar

mirī vo ulfateñ jin kā koī hisāb nahīñ

burā maiñ kaise manā.ūñgā us kī nafrat kā

hisāb meñ vo abhī sāhab-e-nisāb nahīñ

haañ ek-tarfa mohabbat nahīñ gunāh magar

ziyāñ ye vaqt kā hai is meñ kuchh savāb nahīñ

maiñ ḳhud se haarā huā ek aisā shā.ir huuñ

ki jis kī āñkhoñ meñ shohrat kā koī ḳhvāb nahīñ

koī bhī rāsta chun lo mileñge kāñTe hī

nasīb meñ jo hamāre koī gulāb nahīñ

nahīñ hai aas bhī bujhne kī pyaas ab 'sāqib'

huuñ aise dasht meñ jis meñ koī sarāb nahīñ

ye kaisa ghar hai ki jis mein koi kitab nahin

siyah raat hai jis mein ki mahtab nahin

qusur tera hai us ko na dekh pae agar

KHuda ki zat pe warna koi hijab nahin

wo KHak mein na mila de kahin KHafa ho kar

meri wo ulfaten jin ka koi hisab nahin

bura main kaise manaunga us ki nafrat ka

hisab mein wo abhi sahab-e-nisab nahin

han ek-tarfa mohabbat nahin gunah magar

ziyan ye waqt ka hai is mein kuchh sawab nahin

main KHud se haara hua ek aisa shair hun

ki jis ki aankhon mein shohrat ka koi KHwab nahin

koi bhi rasta chun lo milenge kanTe hi

nasib mein jo hamare koi gulab nahin

nahin hai aas bhi bujhne ki pyas ab 'saqib'

hun aise dasht mein jis mein koi sarab nahin