ye kaisa kaam ai dast-e-masih kar Dala

ye kaisā kaam ai dast-e-masīh kar Daalā

jo dil kā zaḳhm thā vo hī sahīh kar Daalā

shab-e-siyāh kā chehra udaas dekhā to

nikal ke chāñd ne us ko malīh kar Daalā

zarā sā jhāñk ke tārīkiyoñ se sūraj ne

malīh chehra-e-shab ko sabīh kar Daalā

maiñ kaise aql kā paikar samajh luuñ insāñ ko

ḳhud apnī ziist ko jis ne qabīh kar Daalā

kal us ne chheḌ ke mahfil meñ tazkira merā

har ek aib-o-hunar ko sarīh kar Daalā

tumhārī dāstāñ uljhī huī thī vahmoñ meñ

duā.eñ do hameñ ham ne fasīh kar Daalā

ye kaisa kaam ai dast-e-masih kar Dala

jo dil ka zaKHm tha wo hi sahih kar Dala

shab-e-siyah ka chehra udas dekha to

nikal ke chand ne us ko malih kar Dala

zara sa jhank ke tarikiyon se suraj ne

malih chehra-e-shab ko sabih kar Dala

main kaise aql ka paikar samajh lun insan ko

KHud apni zist ko jis ne qabih kar Dala

kal us ne chheD ke mahfil mein tazkira mera

har ek aib-o-hunar ko sarih kar Dala

tumhaari dastan uljhi hui thi wahmon mein

duaen do hamein hum ne fasih kar Dala