ye kaisa taghaful hai bata kyon nahin dete

ye kaisā taġhāful hai batā kyoñ nahīñ dete

hoñToñ pe lagā qufl haTā kyoñ nahīñ dete

jo mujh se adāvat hai sazā kyoñ nahīñ dete

ik zarb mire dil pe lagā kyoñ nahīñ dete

dushman huuñ to nazroñ se girā kyoñ nahīñ dete

mujrim ko salīqe se sazā kyoñ nahīñ dete

kis vāste rakhte ho ise dil se lagā.e

chup-chāp merā ḳhat ye jalā kyoñ nahīñ dete

maanā ki yahāñ jurm hai iz.hār-e-mohabbat

ḳhāmosh nigāhoñ se sadā kyoñ nahīñ dete

is dard-e-musalsal se bachā lo mujhe lillāh

jab zaḳhm diyā hai to davā kyoñ nahīñ dete

nafrat tumheñ itnī hī ujāloñ se agar hai

sūraj ko bhī phūñkoñ se bujhā kyoñ nahīñ dete

sho.aloñ kī lapaT aa ga.ī kyā aap ke ghar tak

ab kyā huā sho.aloñ ko havā kyoñ nahīñ dete

ab itnī ḳhamoshī bhī 'suhaib' achchhī nahīñ hai

ahbāb ko ā.īna dikhā kyoñ nahīñ dete

ye kaisa taghaful hai bata kyon nahin dete

honTon pe laga qufl haTa kyon nahin dete

jo mujh se adawat hai saza kyon nahin dete

ek zarb mere dil pe laga kyon nahin dete

dushman hun to nazron se gira kyon nahin dete

mujrim ko saliqe se saza kyon nahin dete

kis waste rakhte ho ise dil se lagae

chup-chap mera KHat ye jala kyon nahin dete

mana ki yahan jurm hai izhaar-e-mohabbat

KHamosh nigahon se sada kyon nahin dete

is dard-e-musalsal se bacha lo mujhe lillah

jab zaKHm diya hai to dawa kyon nahin dete

nafrat tumhein itni hi ujalon se agar hai

suraj ko bhi phunkon se bujha kyon nahin dete

shoalon ki lapaT aa gai kya aap ke ghar tak

ab kya hua shoalon ko hawa kyon nahin dete

ab itni KHamoshi bhi 'suhaib' achchhi nahin hai

ahbab ko aaina dikha kyon nahin dete