ye kaise log hain jo maut par israr karte hain

ye kaise log haiñ jo maut par isrār karte haiñ

jahāñ likkhā hai āhista vahīñ raftār karte haiñ

ḳhalal apne dimāġhoñ kā kareñ ta.abīr jiddat se

ye biivī ke liye māñ-bāp ko āzār karte haiñ

kahāñ ḳhātir meñ laate haiñ ye tājir narḳh-nāme ko

to ham in be-hisoñ se kaahe kī takrār karte haiñ

jo tum ne raaz ulfat kā kiyā ifshā sar-e-mahfil

to ham bhī e'tirāf us kā sar-e-bāzār karte haiñ

bhalā aisoñ kī bātoñ meñ kahīñ tāsīr hotī hai

amal karte nahīñ taqrīr dhūeñ-dār karte haiñ

hameñ to baat karne kā salīqa tak nahīñ aatā

kahāñ ham ko kamāl aisā jo ḳhush-guftār karte haiñ

chalo taslīm karte haiñ ki ab tak yaad haiñ un ko

ravayye se magar kuchh aur vo iz.hār karte haiñ

ye aage se jo sāhab aa rahe haiñ in se bach niklo

ye aisā jhāḌte haiñ falsafa bezār karte haiñ

kabhī dushman huā karte the chhup kar vaar karne ko

magar 'hasrat' abhī ye kaam rishte-dār karte haiñ

ye kaise log hain jo maut par israr karte hain

jahan likkha hai aahista wahin raftar karte hain

KHalal apne dimaghon ka karen tabir jiddat se

ye biwi ke liye man-bap ko aazar karte hain

kahan KHatir mein late hain ye tajir narKH-name ko

to hum in be-hison se kahe ki takrar karte hain

jo tum ne raaz ulfat ka kiya ifsha sar-e-mahfil

to hum bhi e'tiraf us ka sar-e-bazar karte hain

bhala aison ki baaton mein kahin tasir hoti hai

amal karte nahin taqrir dhuen-dar karte hain

hamein to baat karne ka saliqa tak nahin aata

kahan hum ko kamal aisa jo KHush-guftar karte hain

chalo taslim karte hain ki ab tak yaad hain un ko

rawayye se magar kuchh aur wo izhaar karte hain

ye aage se jo sahab aa rahe hain in se bach niklo

ye aisa jhaDte hain falsafa bezar karte hain

kabhi dushman hua karte the chhup kar war karne ko

magar 'hasrat' abhi ye kaam rishte-dar karte hain