ye kaise log hain jo rah mein na-chaar baiThe hain

ye kaise log haiñ jo raah meñ nā-chār baiThe haiñ

baḌe nādāñ musāfir haiñ ki himmat haar baiThe haiñ

agar pahlū se vo uTThe to dil apnā na kyoñ baiThe

ġharaz marne ko har sūrat se ham tayyār baiThe haiñ

zamāne ne na dī fursat jo ham ḳhidmat bajā laate

kisī ne kab hameñ dekhā ki ham be-kār baiThe haiñ

kise fursat ḳhabar le dard-mandoñ kī shab-e-ġham meñ

hazāroñ baar uTThe haiñ hazāroñ baar baiThe haiñ

kabhī uTThe to garm-e-justujū-e-dost meñ uTThe

kabhī baiThe to mahv-e-ārzū-e-yār baiThe haiñ

junūn-e-ishq meñ sahrā-navardī chāk-dāmānī

yahī sab kar ke goyā thak ga.e be-kār baiThe haiñ

na rāhoñ se shanāsā.ī na rahbar se ta.āruf hai

hazāroñ justujueñ kar ke himmat haar baiThe haiñ

ajab ye rang-e-mahfil hai kaheñ to kyā kaheñ hamdam

bahar-sūrat ham us kī bazm meñ bezār baiThe haiñ

kabhī 'dīvān' se dekhā nahīñ ḳhālī ho mai-ḳhāna

jahāñ bhī dekhiye jā kar vahīñ sarkār baiThe haiñ

ye kaise log hain jo rah mein na-chaar baiThe hain

baDe nadan musafir hain ki himmat haar baiThe hain

agar pahlu se wo uTThe to dil apna na kyon baiThe

gharaz marne ko har surat se hum tayyar baiThe hain

zamane ne na di fursat jo hum KHidmat baja late

kisi ne kab hamein dekha ki hum be-kar baiThe hain

kise fursat KHabar le dard-mandon ki shab-e-gham mein

hazaron bar uTThe hain hazaron bar baiThe hain

kabhi uTThe to garm-e-justuju-e-dost mein uTThe

kabhi baiThe to mahw-e-arzu-e-yar baiThe hain

junun-e-ishq mein sahra-nawardi chaak-damani

yahi sab kar ke goya thak gae be-kar baiThe hain

na rahon se shanasai na rahbar se taaruf hai

hazaron justujuen kar ke himmat haar baiThe hain

ajab ye rang-e-mahfil hai kahen to kya kahen hamdam

bahar-surat hum us ki bazm mein bezar baiThe hain

kabhi 'diwan' se dekha nahin KHali ho mai-KHana

jahan bhi dekhiye ja kar wahin sarkar baiThe hain