ye kaise zulm-o-sitam aur aziyyaten kaisi

ye kaise zulm-o-sitam aur aziyyateñ kaisī

paḌī haiñ mere hī pīchhe musībateñ kaisī

huuñ ghar meñ chain se bhūke haiñ mere hamsā.e

kisī ke kaam na aa.e to daulateñ kaisī

hamārī saḌkoñ pe bahtī haiñ duudh kī nahreñ

hameñ pata hai ki hotī haiñ jannateñ kaisī

jo bhuuk se haiñ pareshāñ vo kab samajhte haiñ

ki kyā hai zā.iqa hotī haiñ lazzateñ kaisī

bharā ho peT to aatā hai lutf sajdoñ meñ

vagarna kaisī namāzeñ ibādateñ kaisī

na koī fātiha-ḳhvāñ hai na koī dast-e-duā

ye chaar sū nazar aatī haiñ turbateñ kaisī

na jaane kaun sā chhiḌkā hai aab gulchīñ ne

guloñ pe chhā.ī haiñ 'anjum' ye dahshateñ kaisī

ye kaise zulm-o-sitam aur aziyyaten kaisi

paDi hain mere hi pichhe musibaten kaisi

hun ghar mein chain se bhuke hain mere hamsae

kisi ke kaam na aae to daulaten kaisi

hamari saDkon pe bahti hain dudh ki nahren

hamein pata hai ki hoti hain jannaten kaisi

jo bhuk se hain pareshan wo kab samajhte hain

ki kya hai zaiqa hoti hain lazzaten kaisi

bhara ho peT to aata hai lutf sajdon mein

wagarna kaisi namazen ibaadaten kaisi

na koi fatiha-KHwan hai na koi dast-e-dua

ye chaar su nazar aati hain turbaten kaisi

na jaane kaun sa chhiDka hai aab gulchin ne

gulon pe chhai hain 'anjum' ye dahshaten kaisi