ye kaisi hawa-e-gham-o-azar chali hai

ye kaisī havā-e-ġham-o-āzār chalī hai

ḳhud bād-e-bahārī bhī sharar-bār chalī hai

dekhī hī na thī jis ne shikast aaj tak apnī

vo chashm-e-fusūñ-ḳhez bhī dil haar chalī hai

ab koī hadīs-e-qad-o-gesū nahīñ suntā

duniyā meñ vo rasm-e-rasan-o-dār chalī hai

taktā hī nahīñ koī mai o jaam kī jānib

kyā chaal ye tū ne nigah-e-yār chalī hai

vo log kahāñ jaa.eñ jo kāfir haiñ na dīñ-dār

phir kashmakash-e-kāfir-o-dīn-dār chalī hai

baat aur bhī kuchh mai kī mazammat ke alāva

ye baat to ai shaiḳh ka.ī baar chalī hai

dīvāngi-e-shauq meñ jo kar ga.e ham log

meyār-e-ḳhirad ban ke vo guftār chalī hai

sāzish na ho kuchh dair o haram vāloñ kī is meñ

suntā huuñ ki mai-ḳhāne meñ talvār chalī hai

kab yaad kiyā ham ko 'hafīz' ahl-e-chaman ne

jab ziist sū-e-vādi-e-pur-ḳhār chalī hai

ye kaisi hawa-e-gham-o-azar chali hai

KHud baad-e-bahaari bhi sharar-bar chali hai

dekhi hi na thi jis ne shikast aaj tak apni

wo chashm-e-fusun-KHez bhi dil haar chali hai

ab koi hadis-e-qad-o-gesu nahin sunta

duniya mein wo rasm-e-rasan-o-dar chali hai

takta hi nahin koi mai o jam ki jaanib

kya chaal ye tu ne nigah-e-yar chali hai

wo log kahan jaen jo kafir hain na din-dar

phir kashmakash-e-kafir-o-din-dar chali hai

baat aur bhi kuchh mai ki mazammat ke alawa

ye baat to ai shaiKH kai bar chali hai

diwangi-e-shauq mein jo kar gae hum log

meyar-e-KHirad ban ke wo guftar chali hai

sazish na ho kuchh dair o haram walon ki is mein

sunta hun ki mai-KHane mein talwar chali hai

kab yaad kiya hum ko 'hafiz' ahl-e-chaman ne

jab zist su-e-wadi-e-pur-KHar chali hai